Алматы қаласында жылды қорытындылаған "Beles 2025 – жылдың спорт жетістіктері" фестивалі ұйымдастырылды. Бұл маңызды спорттық-бұқаралық іс-шараға қала тұрғындары, әуесқойлар мен салауатты өмір салтын ұстанатын белсенді азаматтар қатысты.
Фестивальдің негізгі мақсаты — салауатты өмір салтын насихаттау, бұқаралық спортты дамыту және қала тұрғындарын дене шынықтыруға тұрақты түрде тарту болды. Фестиваль аясында қатысушылар физикалық мүмкіндігін сынап, осы жылдағы спорт саласындағы жетістіктерін қорытындылады.
Жарысқа кәсіби спортшылармен қатар әуесқойлар да қатысты. Сонымен бірге балаларға, жасөспірімдерге және мүмкіндігі шектеулі жандарға арналған арнайы тапсырмалар ұсынылды.
"Beles 2025" спорт фестивалі – бұл жыл бойы ел намысын қорғап, халықаралық аренада Қазақстанның атын шығарған спортшыларға көрсетілген құрметтің белгісі. Бұл спорттық іс-шара жылдың қорытындысын шығаратын маңызды межеге айналды. Фестиваль аясында 12 спорттық локация ұйымдастырылды. Әр орында қатысушылар арнайы функционалдық жаттығу орындап, жинаған ұпайын медальға айырбастау мүмкіндігіне ие болды", - деді фестивальдің маңызына тоқталған "Қоғамдық пікір" спорт лигасының өкілі Евгений Шамрай.
Оның айтуынша, фестивальде әр спорттық аймақта айлық форматта жасалған арнайы баннерлер қойылды. Баннерлер газет стилінде безендіріліп, бір жыл ішінде Қазақстан спортшыларының әлемдік аренадағы жетістіктерін көрсетеді.
"Әр ай белгілі бір спорт түріне арналды: мысалы, қаңтар – бокс, ақпан – ауыр атлетика және т.б. спорт салалары. Ал қорытынды - он екінші баннерде Қазақстан спортшыларының бір жылда жеңіп алған жалпы медаль саны мен халықаралық рейтингтегі орны көрсетілді.
Фестивальдің басты мақсаты – бұқаралық спортты дамыту және тұрғындарды салауатты өмір салтына тарту", - деді Евгений Шамрай.
"Бұл іс-шара мен үшін үлкен мотивация болды. Осындай жарыстар жастарды спортқа баулып, мүмкіндігімді ашуға көмектеседі деп ойлаймын. Келесі жылы да міндетті түрде қатысып, бүгінгі нәтижемді жақсартқым келеді", - дейді қатысушы Ілияс Канебай.