Бүгін қалада балалардың шығармашылық және интеллектуалдық дамуына арналған «Шабыт» балаларды дамыту орталығы ашылды, деп хабарлайды aqshamnews.kz
Ашылу рәсіміне Алматы қаласының әкімі Ерболат Досаев қатысып, жаңа ғимараттың ішін аралады. 
Кешен балаларға қосымша білім беру, шығармашылық қабілеттерін дамыту және спортпен айналысу үшін қажетті жабдықтармен қамтылған. Мұнда өнер, IT технологиялар, спорт және сауықтыру бағыттары бойынша түрлі үйірмелер жұмыс істейді. Сонымен қатар, заманауи бассейн, интерактивті сыныптар да бар.
Орталықтың басты мақсаты – балалардың жан-жақты дамуына ықпал ету, шығармашылық қабілеттерін шыңдау. Оқу орны 2500 балаға арналған.
“Бұл нысанның тарихына тоқталсақ, ғимарат 1952 жылы салынған. Ол кезде мұнда Оқушылар үйі орналасқан болатын. Ғимарат ескірді. Сондықтан қала әкімінің тапсырмасымен әлеуметтік жауапкершілік аясында жекеменшік мекемелердің бірі қолдау көрсетіп, ескі ғимарат сүріліп, жаңасы салынды. Қазіргі таңда жаңа ғимараттың жалпы ауданы - 3000 шаршы метрден асады, ал бұрын небәрі 1500 шаршы метр еді. Жалпы, орталықта заманауи құрал-жабдықтардың бәрі бар. 
Басты ерекшеліктерінің бірі – бұл жерде балаларға арналған бассейн бар. Оны кішкентай балалар да, ересек оқушылар да пайдалана алады. Білім беру орталығы бұрын 1000 балаға дейін қабылдай алса, қазір бұл көрсеткіш 2500-ге дейін жетті. Айта кететін жайт, мұнда тек Алмалы ауданының ғана емес, қаланың барлық баласы келе алады.
Қазіргі уақытта Алматы қаласында осындай қосымша білім беру нысандарының санын арттыру бойынша жұмыстар жүргізіліп жатыр. Мәселен, осындай жаңа ғимаратты Бостандық ауданында да салу жоспарда бар. Сонымен қатар, бүгін Алматы қаласы Білім басқармасына қарасты Оқушылар үйінің үлкен концерттік залы ашылды. 550 орынға арналған заманауи зал дыбыс жабдықтарымен толық қамтылып, күрделі жөндеуден өтті. Онда концерттер өткізуге барлық жағдай жасалған”, - деді Алматы қаласы Білім басқармасының басшысы Сайран Сайфеденов.
“ Шабыт” балаларды дамыту орталығының директоры Бақытгүл Мұратқызы:
”Бүгін біз үшін өте маңызды күн. Білім беру жүйесінде жаңа мүмкіндіктер ашылып, балаларды жан-жақты дамытуға арналған орталық ашылды. Бұл қуанышты сәт Наурыз мейрамымен тұспа-тұс келіп отыр. Шығармашылық орталық балаларға мол мүмкіндіктер ұсынады. Орталығымыздың басты нысандарының бірі – бассейн, бұл біздің жаңа спорттық-сауықтыру бағытымыздың бір бөлігі. Сонымен қатар, робототехника кабинеті балалардың техникалық қабілеттерін дамытуға үлкен мүмкіндік береді.
Орталығымыз толықтай инновациялық құрал-жабдықтармен қамтамасыз етілген. Үйірме кабинеттерінде заманауи жиһаз, интерактивті панельдер, моноблоктар және ноутбуктер бар. Балалар bilimalmaty.kz сайты арқылы үйірмелерге тіркеле алады. Мектеп жасындағы балалар үшін үйірмелер тегін, сондай-ақ жеке ақылы үйірмелер де қарастырылған”, - деді.