Алматыда автотұрақтар мен электрсамокаттардың қозғалыс ережелеріне енгізілуі мүмкін өзгерістер талқылануда, – деп хабарлайды aqshamnews.kz тілшісі.
Алматы қаласында автотұрақ кеңістігін, көлік құралдарын эвакуациялау тәртібін және жеке мобильділік құралдарын, соның ішінде электрсамокаттарды пайдалануды реттеуге бағытталған бірқатар нормативтік-құқықтық актілердің жобалары әзірленді.
Ұсынылып отырған өзгерістер қатарында көпқабатты тұрғын үйлердің тұрғындары үшін тұрғылықты жеріне жақын аумақта тегін автотұрақ енгізу, автотұрақ ақысынан босатылатын жеңілдік санатындағы азаматтар тізімін кеңейту, сондай-ақ кейбір автотұрақ аймақтарында тегін уақыт аралықтарын енгізу қарастырылған.
Сонымен қатар, жобаларда электрсамокаттарды орналастыруға арналған арнайы аймақтарды белгілеу, автокөліктерді эвакуациялау бойынша бірыңғай тарифтерді және айыптұрақтардың жұмысына қойылатын талаптарды бекіту көзделген. Жекелеген құжатпен ақылы коммуналдық автотұрақтарды ұйымдастыруға арналған көшелер мен аумақтардың тізбесін бекіту, сондай-ақ автотұрақтарға сараланған тарифтер енгізу ұсынылуда.
Қазіргі уақытта жобалар қолданыстағы заңнамаға сәйкес реттеушілік әсерді талдау рәсімінен өтуде. Талдау аяқталғаннан кейін ережелер жария талқылауға және қарауға ұсынылады. Түскен ұсыныстардың қорытындысы бойынша құжаттарды одан әрі бекіту туралы шешім қабылданады.