Бетперде режимін бұзған азаматтар 87,510 теңге көлемінде айыппұл төлейді.
2021 жылы 24 шілдеде Алматы қалалық әкімдігі, полиция департаменті және қалалық автопарк өкілдерінің қоғамдық көліктердегі карантиндік шаралардың сақталуы туралы бірлескен жиналысы өтті, деп хабарлайды Almaty-akshamy.kz.
Ішкі істер министрлігінің ресми мәліметі бойынша, қоғамдық көліктерде бетперде режимін сақтау бойынша мониторингтік топтар жүргізген тексерулердің нәтижелері жарияланып, талқыланды.
Жиналыс қорытындысы бойынша автобус парктерінің басшыларына жолаушыларды тасымалдау кезінде COVID-19 коронавирустық инфекциясының таралуының алдын алу шараларын күшейту тапсырылды.
Бүгінде коронавирустық инфекцияны жұқтырудың негізгі орындары базарлар, қоғамдық көліктер, мейрамханалар, кафелер, саябақтар, сауда орталықтары және азаматтардың көп жиналатын орындары болып табылады.Қазіргі уақытта қоғамдық көлік жүргізушілері тарапынан жолаушылардың шектеу шараларын сақтауын бақылау жеткіліксіз.
Республикада коронавирустық инфекция бойынша эпидемиологиялық жағдайдың нашарлауын, тұрғындар арасында аурушаңдықтың, оның ішінде мектеп жасындағы балалар аурушаңдығын ескере отырып, қатаң шараларды енгізу қажет:
– қоғамдық көліктерде және метрополитенде автобус жүргізушілері түсіру және отырғызу кезінде жолаушыларға шектеу шараларын сақтау туралы ескерту, әлеуметтік арақашықтық пен бетперде режимінің сақталуын бақылауды күшейту;
– автопарк басшылары автобустар мен троллейбустардың күнделікті санитарлық тазалығын бақылауы қажет;
– инфекция қаупін барынша азайту үшін персоналдың да, жолаушылардың да бетперде режимін сақтауына бақылаушылар енгізу туралы мәселені қарастыру керек;
– карантиндік шараларды бұзушылар анықталған жағдайда, адамдарды әкімшілік жауапкершілікке тарту үшін 102 нөміріне қоңырау шалу керек.
Бетперде режимін бұзғаны үшін ҚР ӘҚбК-нің 425-бабы бойынша 30 АЕК (87,510 теңге) мөлшерінде айыппұл қарастырылғанын ескеру қажет.