Жоба мемлекеттік жастар саясаты аясында жүзеге асырылып жатыр, деп хабарлайды aqshamnews.kz тілшісі.
Алматыда Skill All жобасы аясында 2 мыңнан астам жас тегін білім алды. Қатысушылар IT, маркетинг, дизайн және іс-шара ұйымдастыру салаларында сұранысқа ие мамандықтарды меңгеріп, алған білімін жұмысқа орналасу мен жеке жобасын дамытуға пайдаланып жүр. Бұл туралы Алматының Жастар саясаты басқармасының өкілдері айтты.
2026 жылы 2 қарашадағы мәлімет бойынша курстардан 2 058 адам өткен. Жоба аясында 67 офлайн курс ұйымдастырылды. Сонымен қатар JasAlmaty.kz платформасында қазақ және орыс тілдерінде 30 онлайн білім беру бағдарламасы қолжетімді.
Жоба түлектерінің бірі Нұриттин Орынбеков. Ол іс-шара ұйымдастыру курсын аяқтағаннан кейін Nauryz Fest фестивалін өткізді. Бастапқыда шараға 500-600 адам келеді деп жоспарлағанымен, шын мәнінде мың билет сатылған.
Гүзеля Тұрғанова осындай курстан кейін City Makers қалалық фестивалінде ақылы тағылымдамадан өтіп, өнерпаздармен жұмыс істеді. Кейін іс-шара ұйымдастырумен айналысатын компанияға басшының көмекшісі болып жұмысқа орналасты.
Тағы бір түлек Әсет Хисаров бренд-менеджмент курсын аяқтап, осы бағыт бойынша жұмысқа орналасты. Оның айтуынша, курста алған білімі брендті ілгерілетуге, коммуникация орнатуға және жобаларды ұйымдастыруға көмектеседі.
Кәсіпкер Әлібек Оразалиев таргеттелген жарнама курсын өзіне тиесілі автокөлік қозғалтқыштарына қызмет көрсету бизнесін дамыту үшін пайдаланды. Оқу аяқталғаннан кейін сатылым көлемі мен жарнаманың қамту көрсеткіші артқанын айтты.
Skill All жобасы аясында жастар Python бағдарламалау тілін, QA-тестілеуді, графикалық дизайнды, маркетингті, жобаларды басқаруды және жасанды интеллект құралдарын тегін меңгере алады. Сондай-ақ сәулеттік жобалау мен BIM-модельдеу курстары да бар.
Офлайн сабақтар Алматыдағы жастарға арналған комьюнити орталықтарда, жоғары оқу орындары мен білім беру ұйымдарында өтеді. Жоба мемлекеттік жастар саясаты аясында жүзеге асырылып жатыр. Оның ішінде жұмыс істемейтін және оқымайтын NEET санатындағы жастарды да оқытуға басымдық берілген.
Оқу бағдарламаларымен JasAlmaty.kz сайтында танысуға болады.