Кеңістік келушілердің әртүрлі санатына арналған, деп хабарлайды aqshamnews.kz тілшісі.
Қазақстан халқына арнаған Жолдауында Қасым-Жомарт Тоқаев қалаларды абаттандыру мен қалалық инфрақұрылымды дамытуды маңызды міндеттердің бірі ретінде атап өтті. Алматыда сәулетшілер мен физиктер қала тұрғындары демалып, қолайсыз ауа райынан паналай алатын жайлы модуль жобасын әзірледі. Жоба туралы қауымдастырылған профессор Зауре Аймағамбетова айтып берді.
Жайлы қалалық кеңістік құру идеясын қала әкімдігі ұсынған. Сәулетшілер модульдің жобасын әзірлесе, физиктер оның ішіндегі микроклиматты қарастырған. Кеңістік келушілердің әртүрлі санатына арналған: мұнда балалар ойнап, егде жастағы адамдар демала алады, ал туристер қолайсыз ауа райынан паналап, телефондарын қуаттай алады.
«Бұл модульдің ерекшелігі – оның әртүрлі жастағы адамдарға пайдалы бола алатынында. Бұл – тек бастамасы. Алдағы уақытта тапсырыс берушінің қажеттіліктеріне қарай жеке дизайн әзірлеп, қосымша модульдермен толықтыруға болады», – деп атап өтті Зауре Аймағамбетова.
Профессордың айтуынша, әкімдіктің қолдауымен әзірлемені тәжірибе жүзінде сынақтан өткізу мүмкіндігі жайлы қалалық кеңістік құру идеясын жүзеге асыруға жол ашады.