Сенат пен Мәжіліс депутаттары халықпен ауыл шаруашылығы кооперативтерін құру мәселелерін талқылау аясында Алматы облысының тұрғындарымен кездесті.
Өз кезегінде ауыл шаруашылығы вице-министрі Азат Сұлтанов министрліктің осы бағыттағы жұмысы қалай құрылғанын, сондай-ақ мемлекеттік қолдау көрсетудің жаңа тетіктері туралы айтып берді, деп хабарлайды Almaty-akshamy.kz.
Кеңесте АШМ басшысының орынбасары кооперация ұсақ өндірушілердің, фермерлердің, шаруалардың ортақ мақсаттарға жету үшін ерікті бірлестігі екенін еске салды. Мұндай бірлестіктің кооператив мүшелерінің өзінің заңды және экономикалық дербестігін сақтауы, ресурстарды тиімді пайдалану, өндірілген өнімді тікелей және делдалдарсыз тұрақты өткізу, мемлекеттік субсидиялар алу, жеңілдетілген кредит беру, салық салу және бірқатар артықшылықтары бар.
Сонымен қатар, 2015 жылы «Ауыл шаруашылығы кооперативтері туралы» Заңның қабылдануы нәтижесінде кооперацияны дамытудағы негізгі кедергілер жойылды. Мысалы, кооперативтер коммерциялық емес топтан коммерциялық топқа ауыстырылды және ауыл шаруашылығы кооперативінде пайданы бөлу мүмкіндігі пайда болды, демократиялылық қағидаттары сақталды, қаржылық шаралар мен арнайы салық режимін қолдану көзделген және басқа да артықшылар пайда болды.
«Бүгінгі таңда ауыл шаруашылығы кооперативтеріне өзге ауыл шаруашылығы тауарларын өндірушілермен тең жағдайда, оның ішінде жергілікті бюджет есебінен мемлекеттік қолдаудың барлық шаралары қолжетімді», - деп атап өтті Азат Сұлтанов.
Бұдан бөлек, Инвестициялық субсидиялау қағидаларында ауыл шаруашылығы кооперативтері үшін ауыл шаруашылығы техникалары мен жабдықтарының жекелеген түрлері бойынша құнын жергілікті бюджет қаражаты есебінен 50% -ға дейін субсидиялауға арналған жоғары нормативтер көзделген. Салық кодексінде ауыл шаруашылығы кооперативтері үшін барлық салықтар бойынша 70% жеңілдікті көздейтін арнайы салық режимі көзделген. "Бәйтерек" ҰБХ "АҚ еншілес ұйымдары арқылы кооперативтерге ауыл шаруашылығы өнімдерінің өндірісін арттыру үшін кредиттер беріледі. Мемлекет басшысының бастамасымен елімізде ауыл тұрғындарының табысын ауыл шаруашылығы кооперациясы арқылы арттыру жөніндегі «Ауыл аманаты» жобасы іске асырылуда. 2024 жылы Алматы облысына 17,6 млрд теңге бөлу жоспарлануда.
Өз сөзінде Азат Сұлтанов ауылдағы кооперацияның толыққанды дамуына кедергі келтіретін проблемалық мәселелерді жоққа шығармады. Бұл фермерлердің кооперативтерге деген сенімінің төмендігі, жайылымдар мен шабындық жерлердің жетіспеушілігі, нормативтік құқықтық актілердің жетілдірілмегендігі, ауыл шаруашылығы өнімдері үшін өткізу мен қайта өңдеудің тұрақты нарығының болмауы. Сондықтан Ауыл шаруашылығы министрлігі кооперация туралы түсінікті кеңінен тарату, әр елді мекеннің мамандануын анықтау, сервистік және маркетингтік ауыл шаруашылығы кооперативтерін дамыту, өңірлік әлеуметтік-кәсіпкерлік корпорациялардың әлеуетін пайдалану мақсатында ауқымды ақпараттық жұмыс ұйымдастырды.
«Жалпы, министрлік ауыл шаруашылығы кооперациясын дамыту үшін барлық қажетті шараларды қабылдауда, сонымен қатар біз ауылдық жерлердегі кооперация қызметін одан әрі жетілдіру бойынша ұсыныстарды қабылдауға дайынбыз», - деп түйіндеді Азат Сұлтанов.
Айта кетейік, жиыннан кейін депутаттар Алматы облысының ауыл шаруашылығы тауар өндірушілерімен кездесіп, өңірдегі бірнеше кәсіпорынды аралайды.