21 ақпан – Дүниежүзілік экскурсия жетекшілері күні. Осы айтулы күн қарсаңында Алматы қаласы Музейлер бірлестігі экскурсия жетекшілері арасында «Алматы – музейлер қаласы» кәсіби байқауын ұйымдастырған болатын, – деп хабарлайды aqshamnews.kz тілшісі.
Бүгін сайыстың жеңімпаздары анықталды. Байқау қатысушылары музейлік сторителлинг, квест-экскурсия, тақырыптық маршрут құрастыру, ораторлық шеберлік және кәсіби тестілеу номинациялары бойынша бақ сынады.
"Музей – халықтың тарихи жады мен рухани құндылығын сақтайтын қасиетті орын. Ал сол құндылықты көпшілікке жеткізетін біздегі негізгі тұлға – экскурсия жетекшісі. Ол жай ғана ақпарат беруші қызметкер емес, өткен мен бүгінді жалғайтын алтын көпір. Демек, ол – ұлттық жадымыздың сақшысы. Оның еңбегі арқылы өткеніміз жаңғырып, мәдени мұрамыз ұрпақтан ұрпаққа жетеді. Ал кәсіби байқаулар осы мамандықтың мәртебесін көтеріп, сапалы қызмет көрсетуге жол ашады", – деді Алматы қаласы Мәдениет басқармасының басшысы Данияр Әлиев әріптестерін марапаттау салтанатында.
Байқауға қатысқан 13 экскурсия жетекшісінің үшеуі үздік деп танылды. Олар келушілерге тарихи деректерді шебер жеткізу, көркем сөйлеу, сахналық мәдениеті жоғары маман ретінде бағаланды.
Иә, бірінші орын иеленген Ықылас атындағы халық аспаптар музейінің қызметкері Әдемі Мұратованың қуанышында шек жоқ. Екінші орын алған Нұрғиса Тілендиев мемориалдық музейінің өкілі Қарлығаш Нұрмұханбетованың да мерейі үстем болды. Байқаудың үшінші орны бұйырған Мультимедиалық дәстүрлі музыка орталығының экскурсия жетекшісі Аида Мамырбаеваның да бүгін жұлдызы жарқырады.
Сонымен қатар, Алматы музейлер бірлестігі халықаралық байланыстар бөлімінің жетекшісі Алтынжан Қожамұратова ТҮРКСОЙ халықаралық ұйымының медалімен марапатталып, құшағы гүлге толды.
«Алматы – музейлер қаласы» байқауы – экскурсия жетекшілерінің кәсіби дамуына серпін беріп, музей кеңістігіндегі жаңа идеялар мен заманауи форматтарды қолдауға бағытталған маңызды бастама. Мұндай сайыстар экскурсия жетекшілерінің кәсіби шеберлігін шыңдап, шығармашылық ізденісін арттырып, музей саласының беделін көтере түсері анық.
Жеңімпаздар үшін тағы бір қуанышты жаңалық – олар биылғы сәуірде кәсіби біліктілігін арттыру мақсатында шетелге тағылымдамадан өтуге барады.
Нұржамал ӘЛІШ