Алматы қаласы әкімінің орынбасары Олжас Смағұлов Алатау, Әуезов, Бостандық және Медеу аудандарына барып, жаңа коммуналдық жәрмеңкелер салуға белгіленген аумақтармен танысты.
Әуезов ауданындағы демалыс күнгі жәрмеңкеде ол инвесторлармен, сондай-ақ Алматы қаласының Кәсіпкерлік және инвестициялар басқармасы мен «Алматы» ӘКК өкілдерімен кездесті. Кездесу барысында жәрмеңкелерді жаңғырту және жаңаларын салу жоспарлары талқыланды.
2026 жылы Алматыда демалыс күндері өтетін жәрмеңкелер санын 2,5 есеге арттырып, 1000-нан астам іс-шара ұйымдастыру көзделіп отыр. Сонымен қатар Түркістан, Жетісу, Алматы, Жамбыл, Қарағанды, Шығыс Қазақстан және Абай облыстарынан, сондай-ақ Өзбекстан мен Тәжікстаннан келетін фермерлердің қатысуымен кеңейтілген ауыл шаруашылығы жәрмеңкелерін өткізу жоспарланған.
Жұмыс сапары барысында әкім орынбасары белгіленген бағамен өнім сатылатын әлеуметтік павильондарға ерекше назар аударды. Биыл оларды жаңғырту, сауда алаңдарын кеңейту және жаңа нысандар ашу арқылы қала тұрғындары үшін тауарлардың қолжетімділігін арттыру жоспарланып отыр.