Биыл жаңа жыл қарсаңында ІІМ Алматы академиясының бастығы Қалижан Қобландин жеті бала тәрбиелеп отырған ананың үйіне барып, балаларды мерекесімен құттықтап, оларға кішігірім сыйлық ұсынған болатын.
Сол кезде академия басшысы бұл отбасының ауыр тұрмысын көріп, болашақта да оларға қолдан келгенше қолдау көрсетуді ұйғарған еді. Содан бері академия қызметкерлері мүмкіндігінше осы шаңыраққа көмектесіп келеді.
Жеті перзенттің анасы Гулсараның балалары жас. Сондықтан тәрбиесімен де, үй шаруасымен де өзі ғана айналысады. Сондықтан кез келген көмек ол үшін өте маңызды.
Академия басшысы бұл жолы курсанттармен бірге барып, оларға мұқтаж жандарға қайырымдылық пен қамқорлық жасаудың үлгісін көрсетті. Курсанттар отбасыға әкелген көмірді түсіріп, есігінің алдына жайғастырып берді. Көктем келгенімен әлі жердің тоңы жіби қойған жоқ, күн салқын, сондықтан көмір керек.
Қасиетті Рамазан айында ананың ақ батасын алу әрдайым ерекше сезім сыйлайтыны анық. Курсанттар халыққа қызмет ету ең алдымен адамдарға көмектесуден, қарапайым жақсы істерден басталатынын сезініп қайтты.
Нұржамал ӘЛІШ