Сарапшы мамандар медиация жөнінде жан-жақты баяндап, жауап берді, деп хабарлайды aqshamnews.kz тілшісі.
Алатау ауданындағы "Alatau creative hab" орталығында қалалық конференция өтті.
Алматы қаласы Ішкі саясат басқармасының қолдауымен өткен конференция тақырыбы "Заң мен тәртіп: қоғамдағы медиацианың рөлі" болды.
Жиынға мемлекеттік органдар, сот, бизнес, құқық қорғау органдары өкілдері, жастар қатысты. Сонымен қатар медиация саласы мамандары, сарапшылар болды.
Конференцияда "Парасат" орталығы директорының орынбасары, медиатор- тренер Мұхтар Адаев баяндама жасады.
Отырыста ҚР Президенті Қасым-Жомарт Тоқаевтың "Заң мен тәртіп" қағидаты аясында қоғамдық медиацияның қызметі талқыланды.
Сөз алғандар медиация қызметіне байланысты түрлі жағдайларды ортаға салды. Медиация қызметімен таныс емес жандар түрлі сұрақтар қойып жатты. Сарапшы мамандар медиация жөнінде жан-жақты баяндап, жауап берді.
Жалпы, медиация дегеніміз - қарапайым тілмен айтқанда кез-келген мәселені сотқа жеткізбей шешу.
Сарапшылардың айтуынша біздің елде медиация қызметіне жүгінген істердің 80-90 пайызы оң шешімін табады екен.
Мегаполисте өткізілетін осындай конференциялардың елге берері көп.
Қарапайым халық бірден сотқа жүгірмей, медиация қызметіне жүгінсе көп нәрсе тез шешілер еді.
Нұрлан СҮЙІН