Алматы қаласының Алмалы ауданында тұрғындардың өтінішімен жүзеге асырылған жобаларға арналған баспасөз туры өтті, деп хабарлайды aqshamnews.kz
Панфилов көшесі жаңғыртылды
Алғашқы нысан – қаланың негізгі жаяу жүргіншілер көшелерінің бірі Панфилов көшесі болды. Күн сайын бұл көшеден 10-15 мың адам өтеді, демалыс және мереке күндері бұл көрсеткіш бірнеше есеге артады. Аудан әкімі Арман Шамшиннің айтуынша, көшенің жоғары жүктемесі және тауар жеткізетін автокөліктердің көптігі жол төсеміне және декоративті элементтерге үлкен салмақ түсіреді. Осыған байланысты тұрғындар көшені жаңартуды сұраған.
2017 жылдан бері алғаш рет көшені жөндеу туралы шешім қабылданып, қыркүйек айында басталған жұмыстар аясында:
- 2 мың шаршы метр кеспе тас жаңартылды,
- 130 жаңа орындық және 2 балалар алаңы орнатылды,
- субұрқақ жөнделді,
- жасыл аймақ 20%-ға кеңейтіліп, жаңа бұталар отырғызылды.
Сондай-ақ қолөнершілерге арналған модульді үйлер, стационарлық полиция бекеті және заманауи «Сапар орталығы» орнатылды. Тұрғындар жаңартылған көшенің қолайлылығын жоғары бағалады.
№136 мектептегі күрделі жөндеу
Келесі нысан – №136 жалпы білім беретін мектеп. Мұнда 35 жылдан бері алғаш рет сейсмикалық нығайту арқылы күрделі жөндеу жұмыстары жүргізілді:
- робототехника, химия, биология, физика, информатика кабинеттері жаңартылды,
- ұлдар мен қыздарға арналған технология кабинеттері мен шеберханалар жабдықталды,
- барлық пән кабинеттері интерактивті панельдер және жаңа жиһаздармен қамтамасыз етілді.
«Шығыс АЗТМ» сквері
Баспасөз туры барысында журналистер «Халық қатысатын бюджет» бағдарламасы аясында жаңғыртылған «Шығыс АЗТМ» скверін де аралады. Жаңа «Номад» тұрғын үй кешенінің тұрғындары бұл бастаманы көтерген.
Сквер аумағында:
- тренажерлер, жаяу жүргіншілер жолдары,
- 10 мың шаршы метр көгал, гүлдер мен ағаштар отырғызылды,
- жаңа жарықтандыру жүйесі орнатылды.
Қала тұрғыны әрі «ХҚБ» жобасының тең авторы Алена Шин бұл сквердің аудан мақтанышы екенін атап өтті:
"Бұл тек сквер ғана емес, жасанды тоғаны бар бірегей орын. Балаларым осы жерде ойнайды, волейбол алаңы да керемет. Отбасылық демалыс үшін барлық жағдай жасалған."
Жаңа қоғамдық кеңістік
Соңғы нысан – Розыбакиев көшесінің бойында, Дүйсенов көшесінен оңтүстікке қарай орналасқан жаңа сквер. Бұрын бұл аумақта бейберекет сауда орындары болған, тұрғындар бірнеше рет жасыл аймақ құруды сұраған.
Нәтижесінде:
- шамамен 2 мың шаршы метр көгалды аймақ,
- гүлдер мен ағаштар отырғызылды,
- орындықтар, тренажерлер, перголалар, балалар алаңдары мен жүгіру жолдары орнатылды,
- автоматты суару және жарықтандыру жүйесі іске қосылды.
Тұрғын Әсем Нұрғазина бұл өзгерістерге ризашылығын білдірді:
"Бұрын мұнда бейберекет базар болды, қазір әдемі, жасыл демалыс орнына айналды. Ересектер де, балалар да жайлы уақыт өткізе алады."
2023 жылы Алмалы ауданында «Халық қатысатын бюджет» бағдарламасы аясында 34 жоба жүзеге асырылса, 2024 жылы 52 жоба жоспарланған.
"Жасыл демалыс аймақтары қаланың экологиялық жағдайын жақсартуда маңызды рөл атқарады. Біз әрқашан тұрғындардың бастамаларын қолдаймыз," – дейді аудан әкімі Арман Шамшин.