Қазақстанның ең ірі әуе компаниясы – Air Astana акционерлік қоғамы осы жылдың үшінші тоқсанындағы және 2024 жылдың 9 айындағы қаржылық және операциялық нәтижелерін жариялады.
Компанияның мәліметінше, өткен жылдың сәйкес кезеңімен салыстырғанда кірістер 10,4%-ға өсіп, 410,0 млн АҚШ долларға жеткен. Жолаушы тасымалы өткен жылмен салыстырғанда 9,9%-ға артып, компания 9 ай ішінде 2,8 миллион адам тасымалдаған.
Air Astana тобының бас атқарушы директоры Питер Фостер компанияның өзге де жетістіктері туралы айтып өтті:
– Мен жалпы авиация саласына жасалып жатқан қысымдарға қарамастан, үшінші тоқсандағы қызметтің жоғары нәтижелері туралы қуана хабарлаймын. Біз компанияның тасымалдау сыйымдылығы мен операциялық тиімділігін арттыруда айтарлықтай жетістіктерге жетудеміз. Біздің флотты дамыту жоспары кестеден озып орындалып, ұшақтар саны 57-ге жетті. Сонымен қатар, біз 2024 жылы флоттан екі E2 ұшағын шығардық, ал келесі жылы да E2 ұшақтарын шығаруды жоспарлап отырмыз, – деді ол.
Сондай-ақ, Питер Фостер Air Astana тобының Жапония әуе компаниясымен серіктестік орнатқанын атап өтті:
– Тамызда біз әлемдегі үздік әуе компанияларының бірі Japan Airlines (JAL) компаниясымен кодшерингтік келісімге қол қойдық. Бұл Қазақстан мен Жапония арасындағы іскер адамдар мен туристер үшін қатынасты арттырады және елдеріміз арасындағы жолаушылар легі мен тауар айналымын кеңейтуге ықпал етеді, – деді ол.
Тақырыпқа орай
Әуе билетін қашан сатып алған абзал?
Питер Фостер, Air Astana тобының бас атқарушы директоры:
– Менің басты кеңесім – ұшаққа билетті алдын ала алыңыздар. Егер Еуропаға саяхаттағыңыз келсе, маусым немесе қыркүйек айларына билет алған абзал. Азия құрлығын аралағыңыз келсе, қысқы мезгіл – ең қолайлы уақыт. Бірақ келесі үш уақыттан аулақ болған жөн: Еуропада Рождество мен жаңа жыл тойланатын кезең, сондай-ақ Қытай жаңа жылы. Бұл уақытта адам көп, және кез келген қызметтің бағасы өте жоғары болады.