Air Astana Астанадағы өз инженерлік-техникалық орталығында мерейтойлық 50-ші C-check-ті Airbus A320 әуе кемесінде сәтті аяқтады. Бұл – әуекомпанияның құзыреттерін дамытудағы және Қазақстанда әуе кемелеріне күрделі техникалық қызмет көрсету жүйесін қалыптастырудағы маңызды кезең нышаны.
Елу C-check орындау инженерлік базаны дамыту, білікті кадрларды даярлау және Air Astana тобы ішіндегі өндірістік қуатты арттыру бойынша жүргізілген көпжылдық жүйелі жұмыстың нәтижесін көрсетеді. Әрбір C-check ондаған мың регламенттік жұмысты, халықаралық авиациялық стандарттарға қатаң сәйкес кешенді құрылымдық және жүйелік тексерулерді қамтиды және 20 мыңнан астам адам-сағатқа дейінгі еңбек ресурстарын талап етеді.
«Мерейтойлық 50-ші C-check – инженерлік құзыреттерді, инфрақұрылымды және адами капиталды дамытуға бағытталған дәйекті инвестицияларымыздың нәтижесі», – дейді Астанадағы авиациялық-техникалық орталықтың директоры Роберт Дандо. «Күрделі техникалық қызмет көрсету түрлерін өз күшімізбен орындау жұмыстар сапасына толық бақылау жасауға, шетелдік мердігерлерге тәуелділікті азайтуға және ел ішінде азаматтық авиацияның техникалық сараптамасын дамытуға мүмкіндік береді».
Қазіргі таңда Air Astana Алматы және Астанадағы техникалық базаларында Airbus әуе кемелері тобына C-check-тің барлық түрін дербес орындайды. 2019 жылдан бері әуекомпания стандарттыдан бастап ең күрделі түрлеріне дейінгі техникалық қызмет көрсетуді жүзеге асырды, оның ішінде: 28 – C1-check, 5 – C2-check, 10 – C6-check және 7 – C12-check. Осы уақыт ішінде жаһандық авиацияның үздік тәжірибесіне сәйкес халықаралық EASA Part 66 лицензиялары бар сертификатталған инженерлер мен механиктердің білікті командасы қалыптастырылды.
Жоғары технологиялық құзыреттерді жүйелі түрде дамыту Air Astana-ның Қазақстанның авиация саласын өркендетуге, технологиялық дербестікті нығайтуға және әуе кемелерінің жоғары сенімділігі мен қауіпсіздігін қамтамасыз етуге қосқан үлесін айқындайды.