Үш дүркін әлем чемпионы Назым Қызайбай жеке бокс залын ашу жоспары үшін Олимпиададан кейін сыйға алған көлігін сататынын айтты, деп хабарлайды AqshamNews.kz тілшісі.
Боксшының жазуынша, 2025 жылға үш үлкен мақсат қойған: әлем чемпионатын үшінші рет жеңу, ата-анасына кең үй алып беру және өз залының есігін ашу. Оның айтуынша, бұл жоспарлардың екеуі орындалған.
«Үш дүркін әлем чемпионы болдым. Биыл екі әлем чемпионаты өткендіктен, рекордымды жаңартқым келген еді, бірақ екіншісінде күміс медаль алдым. Осылайша әлем чемпионатындағы жүлделерім толық комплект болды. Отбасыма үлкен үй алдым, бәрі қуанып отыр», – деп бөлісті спортшы.
Назым Қызайбай жыл соңына дейін үшінші арманын да жүзеге асырмақ. Ол өзіне ұнаған шағын ғимаратты қарап қойғанын айтып, соған қаражат жинау үшін көлігін сатуға шешім қабылдағанын жеткізді.
«Қазір шағын ғимаратты қарастырып қойдым, көңілімнен шықты. Сондықтан бір хабарландыру жасайын дедім: өзімнің көлігімді сатамын. Бұл көлік маған Олимпиададан кейін сыйға берілген. Бір жылдан аса уақыт міндім, жағдайы жақсы», – деп түйіндеді ол.