Алматы қаласы мәслихатының депутаттары Қазақстан Республикасының жаңа Конституциясын қабылдау жөніндегі 15 наурызда өтетін референдумды қолдайтындарын білдіріп, оның мемлекеттілікті нығайту, ұлттық бірлік пен елдің тұрақты дамуы үшін маңыздылығын атап өтті, – деп хабарлайды aqshamnews.kz тілшісі.
Алматы қаласы мәслихатының депутаты Қарашаш Джузеева Конституция қоғамның бірлігі мен тұрақтылығының кепілі екенін айтты.
«Елдің дамуы мен өркендеуі ортақ заңға деген құрметтен басталады. Жаңа Конституция – ұлттық бірлікті сақтап, мемлекеттіліктің негізін нығайтатын маңызды құжат. Алдағы референдум – демократияның ең жоғары көрінісі, Қазақстан халқының еркін білдіруі. Референдумды қолдау – еліміздің болашағына деген сенім», – деді ол.
Алматы қаласы мәслихатының депутаты Алтынай Көбеева да алдағы референдумның маңыздылығына тоқталып, жаңа Конституция әділетті мемлекет құрудың берік негізі болатынын атап өтті.
«Ол теңдік пен жауапкершілік, ашықтық пен сенім қағидаттарын нығайтады. Конституцияны қолдай отырып, біз болашақ ұрпаққа мықты әрі қуатты ел қалдырамыз», – деді ол.
Сондай-ақ Алматы қаласы мәслихатының депутаты Серік Есматов та өз ұстанымын білдіріп, жаңа Конституцияны қабылдау Қазақстанның одан әрі дамуы мен әділеттілік қағидаттарын нығайту жолындағы маңызды қадам болатынын атап өтті.
Депутаттар референдумға қатысу – әрбір қазақстандықтың азаматтық жауапкершілігі әрі елдің болашағына үлес қосудың мүмкіндігі екенін айтты.
15 наурыз күні алматылықтарды белсенді азаматтық ұстаным танытып, дауыс беруге қатысуға шақырады.
