15 наурызда Қазақстанда жаңа конституцияны қабылдау жөнінде республикалық референдум өтеді. Маңызды саяси оқиға қарсаңында Алматының шығармашылық зиялы қауым өкілдері арнайы үндеу жасады, – деп хабарлайды aqshamnews.kz тілшісі.
Қазақстан Республикасының еңбек сіңірген қайраткері, актер Жан Байжанбаев референдум әр азаматқа ел болашағына ықпал етуге мүмкіндік беретінін айтты. Ол қазақстандықтарды 15 наурыз күні сайлау учаскесіне келіп, саналы шешім қабылдауға шақырды.
Актер Қайрат Игіліков өз үндеуінде жаңа конституция азаматтардың құқығы мен міндетін бекітіп, бірлік, әділдік, білім мен ғылымды дамыту сияқты негізгі құндылықтарды орнықтыруы тиіс екенін атап өтті. Ол ұсынып отырған реформалар дамудың жаңа кезеңіне жол ашып, азаматтық бастамалар мен цифрлық платформалардың елдің саяси жүйесіндегі рөлін күшейтетініне сенім білдірді.
Алатау театрының актері Тілек Базаров жаңа конституция жобасын Қазақстанның болашағын айқындайтын тарихи құжат деп атады. Айтуынша, құжатта білім беруге, ғылым мен жастарды қолдауға көп көңіл бөлген.
«Бұл балаларымыз бен келер ұрпақтың қамын ойлайтын маңызды шешім. Біз сыртттан бақылап қана отырмай, үлес қосуымыз керек осыған», – дейді.
Театр мен кино актері Тимур Пиязов реформаға қатысты қоғамдық талқылау мен халықаралық жарияланымдарды мұқият зерттеп, содан кейін ғана өз ұстанымын қалыптастырғанын айтты. Оның сөзінше, мұндай сәттерде ақпаратты өз бетінше саралап, саналы шешім қабылдау аса маңызды.
Актер Медет Аманбаев та референдумға қатысуды қолдап, елдің одан әрі дамуы үшін әр адамның дауысымен санасуымыз керек дейді.
Алматының шығармашылық зиялы қауым өкілдері референдум – мемлекеттің стратегиялық даму бағытын айқындауға берілген мүмкіндік екенін бірауыздан айтып отыр. Олар қазақстандықтарды азаматтық белсенділік танытып, 15 наурыз күні дауыс беруге қатысуға шақырады.