Алматыда 2026 жылдың басынан бері 14,3 мың жас жұмыспен қамтылды. Оның 10,6 мыңы тұрақты жұмысқа орналасса, тағы 3,7 мыңы уақытша жұмыспен қамтылды, – деп хабарлайды aqshamnews.kz тілшісі.
Бұл туралы қалалық Жастар саясаты басқармасының өкілдері хабарлады.
Ведомствоның мәліметінше, бүгінде Алматыда 14 пен 35 жас аралығындағы 769,4 мың жас тұрады. Бұл қала халқының 32 пайызы. Олардың 472,8 мыңы – жұмыспен қамтылған жастар.
Қалада еңбек нарығында сұранысқа ие мамандықтарға оқытуға ерекше көңіл бөлініп келеді. Жыл басынан бері 9,2 мыңнан астам жас оқудан өтті. Соның ішінде шамамен 4,1 мыңы жұмысқа орналасты.
Сонымен қатар жазғы кезеңде «Жасыл ел» жобасы аясында 1,1 мың жас жұмыспен қамтылды.
Алматыда NEET санатындағы жастардың үлесі де төмендеді. Егер 2025 жылдың қорытындысында бұл көрсеткіш 5,7 пайыз болса, 2026 жылдың бірінші тоқсанында 4,9 пайызға дейін азайды. Ал жастар арасындағы жұмыссыздық деңгейі 3,8 пайыз болды.
Жыл соңына дейін кемінде 22 мың жасты жұмыспен қамтып, шамамен 12 мың адамды оқыту және кәсіби даярлау шараларымен қамту жоспарланып отыр.