Абай атындағы Қазақ ұлттық педагогикалық университеті Тарих және құқық институты кафедрасының меңгерушісі Жомарт Симтиков жаңа Конституцияның күшіне енуі Қазақстанның саяси жүйесін жаңғыртуға және ел дамуының жаңа кезеңін бастауға негіз болатынын мәлімдеді, – деп хабарлайды aqshamnews.kz тілшісі.
Сарапшының айтуынша, жалпыхалықтық дауыс беру нәтижесінде қабылданған Ата заң қазіргі заман талаптарына жауап беретін саяси реформаларды жүзеге асыруға және мемлекеттік басқару жүйесін одан әрі жетілдіруге бағытталған.
«Жаңа Конституция – еліміздің саяси жүйесін бүгінгі күн тәртібіне сай бейімдеп, ауқымды реформалық және модернизациялық үдерістерді іске асыруға мүмкіндік беретін маңызды құжат. Қазақстанның әлемдік бәсекеге қабілетті мемлекеттердің қатарындағы орнын нығайтып, жаһандық өзгерістер жағдайында тұрақты дамуын қамтамасыз ету үшін оның маңызы зор», – деді Жомарт Симтиков.
Оның пікірінше, жаңа редакциядағы Конституция ұлттық бірегейлікті сақтай отырып, Қазақстан мемлекеттілігінің жаңа дәуірін қалыптастыруға негіз қалайды.
Сондай-ақ сарапшы Конституцияның преамбуласында қазақ мемлекеттілігінің тарихи сабақтастығына ерекше мән берілгенін атап өтті.
«Ата заңда халқымыздың тарихи тамыры мен мемлекеттілігінің терең негіздері айқын көрініс тапқан. Бұл – ұлттық құндылықтарды сақтауға және елдің бірлігін нығайтуға бағытталған маңызды қадам», – деді ол.
Жомарт Симтиковтың айтуынша, жаңа Конституция азаматтардың құқықтары мен бостандықтарын қорғауды күшейтіп, демократиялық институттарды дамытуға және Қазақстанның ұзақ мерзімді орнықты дамуына берік құқықтық негіз қалыптастырады.