Астанада блогерлер Ерболат Жанәбілов пен Эльмира Төлегеноваға қатысты қылмыстық іс бойынша сот талқылауы жалғасып жатыр. 18 наурызда сот процеске келмеген куәгерлерді мәжбүрлеп алдыру туралы қаулы шығарды, – деп хабарлайды aqshamnews.kz тілшісі Tengrinews.kz-ке сілтеме жасап.
Атап айтқанда, мәселе Дархан Жолшыбеков пен Justking деген атпен танымал Нұрбек Нұртазаға қатысты болып отыр.
Сотталушылардың адвокаты Гауһар Айтжанова куәгерлердің бір бөлігіне отырыс туралы хабарлау мүмкін болмағанын жеткізді.
"Басқа куәгерлер жоқ, кейбіреулеріне хабарласа алмадық. Тағы бір куәгердің аяғы ауыр, оның емшектегі баласы бар, қазір ол ауруханада тексерілуден өтіп жатыр, ертең оны ауруханаға жатқызуы керек", - деп түсіндірді ол.
Мемлекеттік айыптаушы Олжас Хайруллаев, өз кезегінде, екі куәгер — Дархан Жолшыбеков пен Нұрбек Нұртазаға (Justking) сотқа келу қажеттілігі туралы тиісті түрде хабарланғанын, алайда олардың белгісіз себептермен келмегенін мәлімдеді. Осыған байланысты ол келесі отырысқа оларды мәжбүрлеп алдыру туралы өтініш білдірді. Адвокат айыптау тарапының ұстанымын қолдады.
"Бұл мәселеде мен прокурорды қолдаймын. Мен де куәгерлердің сот отырысы залына келуін талап етемін", - деді Айтжанова.
Судья Әділбек Баймаханов прокурордың өтінішін қанағаттандыру туралы қаулы қабылдады.
"Сот прокурордың пікірімен келісіп, мәжбүрлеп алдыру туралы тиісті қаулы шығаруды ұйғарды. Қаулы орындалу үшін Астана бойынша Экономикалық тергеу департаментіне жіберіледі. Орындалуын бақылау Астана прокуратурасына жүктеледі", - деді судья.