28 наурызда Қазақстанда халықаралық «Жер сағаты» экологиялық акциясы өтеді, деп хабарлайды Aqshamnews.kz тілшісі.
Экологиялық бастама сенбі күні кешкі сағат 20:30-дан 21:30-ға дейін жалғасады. Осы уақыт аралығында тұрғындар жарық пен электр құрылғыларын бір сағатқа өшіруге шақырылады.
«Жер сағаты» акциясы алғаш рет 2007 жылы Австралияның Сидней қаласында ұйымдастырылған. Қазір бұл бастама әлемнің 180-нен астам елінде өтіп, табиғатты қорғау мәселесіне қоғам назарын аударуға бағытталып отыр.
Мамандардың айтуынша, бір сағатқа жарықты өшіру экологиялық түйткілдерді бірден шешпейді. Дегенмен бұл қоғамның қоршаған ортаға жауапкершілігін күшейтіп, энергияны үнемді пайдалануға үндейді.
Алматы қалалық кәсіпкерлік және инвестициялар басқармасының мәліметінше, акцияға қаладағы ондаған сауда және коммерциялық нысан қосылады. Олардың қатарында Dostyk Plaza, Forum, Atakent Mall, Asia Park, Moskva Metropolitan, Mega Almaty, Almaty Mall, Grand Park, Sputnik Mall, ЦУМ және басқа да ірі сауда орталықтары бар.
Сондай-ақ акцияға бірқатар сауда үйлері, сауда кешендері мен «Көк базар» да қатысады.