Шымкенттің 90 жастағы тұрғыны алаяқтардың арбауына түсіп, жарты миллион теңгесінен айырылып қалды. Қарт кісіге белгісіз тұлға қоңырау шалып, өзін полиция қызметкері ретінде таныстырып, келіні жол-көлік оқиғасын жасағанын хабарлаған. Алаяқ мәселені белгілі бір сомамен шешуге болатынын және зейнеткерден ол ақшаны курьер алып кететіндігін айтқан. Туысына көмектесу үшін қарт ана алаяқтарға барлық жинап-терген қаражатын, яғни жарты миллион теңгесін беріп жіберген.
Іздестіру іс-шараларының барысында тәртіп сақшылары бейнебақылау камераларының көмегімен жәбірленушінің үйінен қолма-қол ақшаны алу үшін келген тұлғаны анықтап, ұстады. Ол 33 жастағы қала тұрғыны болып шықты. Өз жауабында ұсталған ер адам мессенджер арқылы алған нұсқауға сәйкес әрекет еткенін жеткізді. Алған ақшаны белгілі бір шотқа аударуға келіскен ол шартты орындамай, алаяқ “жұмыс берушісін” алдап кеткен екен.
Қазіргі таңда қылмысқа қатысы бар басқа да тұлғаларды анықтауға бағытталған тергеу жұмыстары жүргізіліп жатыр. Құқық қорғаушылар азаматтарға алаяқтықтың осы түрі туралы еске салады.
Полиция қызметкерлері азаматтарды алаяқтардың арбауына түсіп қалмауға шақырады:
- Алаяқтар өздерін полицейлер ретінде таныстырып, туысыңыздың қиындыққа тап болғанын хабарлап, мәселені белгілі бір ақша қаражаты шешетінін айтуы мүмкін. Мұндай жағдайда бірден полицияның “102” нөміріне қоңырау шалып, ақпаратты тексеріңіз.
- Үрейленбеңіз, әсіресе бейтаныс адамдарға ақша аудармаңыз.
Бұл жағдай азаматтарды сақ болуға және алаяқтардың арбауына түспеуге шақырады. Құқық қорғау органдарының ескертулерін ескеріп, күдікті жағдайларда дереу полицияға хабарласу қажет.