Мамандар мұндай порталдар авторлардың құқығын бұзып, кез келген материалды рұқсатсыз пайдалануға бейім дейді.
Оның ішінде шетелдік сайттар да бар. 2020 жылы осындай 24 сайт анықталса, 2021 жылы олардың саны 40-қа жеткен. Енді мұндай сайттарға бақылау мен авторлық құқықты қорғау күшейтіледі, деп хабарлайды Almaty-akshamy.kz 24.kz-ке сілтеме жасап.
Сенаторлар ТМД кеңістігіндегі келісімді ратификациялау туралы заңды мақұлдады. Депутаттардың айтуынша, құжат құқықбұзушылыққа тосқауыл болып, сала жұмысын оңтайландырады. Сондай-ақ көрші мемлекеттермен сауда-экономикалық және мәдени байланысты кеңейтуге оң ықпалын тигізеді.
«Авторлардың шығармашылығын пайдаланып, қаражат табу көзделсе, осы бағытта ғана заңбұзушылық орындалады. Ал жеке өзіңіздің қолдануыңызға жүктеп пайдалансаңыз, бұл құқықбұзушылыққа жатпайды. Сайттарда авторлық құқықтардың бұзылуы орын алған. Авторлық құқық бұзылған шығарманы алып тастау, егер оған келіспесе, оны бұғаттайды», - дейді ҚР Парламенті Сенатының депутаты Амангелді Толамисов.