WhatsApp қолданушыларға арналған қауіпсіздік пен пайдалануды жеңілдетуге бағытталған бірнеше жаңа мүмкіндікті іске қосты.
Енді WhatsApp-та экранды өз контактілеріңізде жоқ адаммен бөлісуге тырысқанда, бағдарлама арнайы ескерту шығарады. Қолданушы осы терезе арқылы әрекетті бірден тоқтата алады, - деп хабарлайды Aqshamnews.kz.
Бұл жаңалық телефонды «реттеп береміз» деген желеумен бөтен адамдардың экрандағы жеке ақпаратқа, банк қызметтеріне немесе құпия деректерге қол жеткізуіне жол бермеу үшін енгізілген.
Android жүйесіне арналған WhatsApp-тың жаңа бета-нұсқасында (2.25.34.5) жадты тазалаудың кеңейтілген құралдары пайда болды. Енді пайдаланушылар: барлық хат-хабарды толық өшіруге, тек медиафайлдарды тазалауға және жеке файл түрлерін ғана (фото, видео, құжат, аудио, стикер) жоюға мүмкіндік алады.
Өшіру алдында растау терезесі пайда болып, жұлдызшамен белгіленген маңызды хабарламаларды сақтап қалу мүмкіндігі беріледі. Бұл қажет ақпаратты кездейсоқ жойып алмауға көмектеседі. Компанияның айтуынша, жаңартылған тетік чаттарды реттеуді бұрынғыдан да қарапайым етеді. Қазіргі кезде функция шектеулі түрде ғана қолжетімді, ал жақын күндері Android қолданушыларының көпшілігіне таратылады.
Ал, 2.25.34.6 нұсқасындағы бета-тестілеу барысында Shake-to-Report деп аталатын жаңа мүмкіндік те сынақтан өтуде. Телефонды жеңіл шайқау арқылы қолданушы бірден ақау туралы хабарлау бөліміне кіре алады.
Шайқау әрекеті жасалғаннан кейін қолданба, бұл қадамды растауды сұрайды. Сондай-ақ, автоматты түрде скриншот дайындайды және құпия ақпарат бар аймақтарда скриншот алынбайды.
Функция қажет болмаса, баптаулардан өшіруге болады. Әзірлеушілер бұл жаңалық қосымшадағы мәселелерді жедел анықтауға және сервистің тұрақтылығын арттыруға көмектесетінін айтады.