Венесуэланың уақытша билігі АҚШ-қа 30–50 миллион баррель мұнай жеткізуге келісті, деп хабарлайды Aqshamnews.kz тілшісі.
Бұл туралы АҚШ президенті Дональд Трамп Truth Social әлеуметтік желісіндегі парақшасында мәлімдеді. Оның айтуынша, Венесуэладан тасымалданатын мұнай нарықтық бағамен сатылады, ал одан түскен қаржы тікелей өз бақылауында болады.
«Бұл келісім екі ел халқының да мүддесіне сай жұмыс істеуі тиіс», – деп жазды Дональд Трамп.
АҚШ президенті аталған келісімді жедел іске асыруды энергетика министрі Крис Райтқа тапсырған. Жоспарға сәйкес, мұнай арнайы танкерлер арқылы АҚШ аумағына тікелей жеткізіледі.
Жеткізу процесі мамандандырылған кемелермен жүзеге асырылады. Олар мұнайды тікелей түсіру терминалдарына апарып, логистиканы жеделдетуге мүмкіндік береді.
Бұған дейін Дональд Трамп америкалық әскерилердің Каракаста жүргізілген түнгі операция барысында Венесуэланың бұрынғы басшысы Николас Мадуро мен оның жұбайын ұстап, елден алып шыққанын мәлімдеген болатын. Ақпарат көздері әскери және стратегиялық нысандарға, соның ішінде парламент ғимаратына соққылар жасалғанын хабарлады.
Сондай-ақ АҚШ президенті Венесуэлада билік ауысқаннан кейін елді уақытша басқару міндетін АҚШ өз мойнына алатынын айтқан. Кейін Венесуэла Жоғарғы соты бұрынғы атқарушы вице-президент Делси Родригесті уақытша мемлекет басшысы етіп тағайындады.
