Велосипед мініп жүрудің пайдасы жайлы дәрігер айтты.
Шайтанарбаға отырып алып, онымен желдей есудің денсаулық үшін біз біле бермейтін пайдасы көп екен. Бұл туралы «Гемотест» зертханасының сарапшысы, дәрігер Екатерина Демьяновская айтты, деп хабарлайды Almaty-akshamy.kz.
Денсаулыққа пайдасынан бөлек, шап-шағын әрі ыңғайлы бұл көліктің қоршаған ортаға да еш зияны жоқ екенін еске сала кеткен артық болмас.
Демьяновскаяның айтуынша, велосипедпен жүру кезінде адам жиі және терең тыныс алады, бұл денеге көбірек оттегі береді. Бұл иммунитетті нығайтады, инфекция қаупін азайтады және әжімдердің пайда болу процесін баяулататын коллагеннің бөлінуіне ықпал етеді. Сондай-ақ, қосымша оттегі есте сақтау мен ойлау қабілетіне жақсы әсер етеді.
Сонымен қатар, велосипедпен жүру – бұл жүрек үшін таптырмайтын жақсы кардио жаттығулар. Мұндай жаттығулардың арқасында жүрек-қан тамырлары жүйесі жақсарады және артериялық гипертония, атеросклероз, инфаркт және инсульт қаупі төмендейді. Велосипед төзімділікті арттыруға, майды ерітуге және бұлшықетті өсіруге көмектеседі. Сондай-ақ, велосипедпен жүру жүйке жүйесіне жағымды әсер етеді және көңіл-күйді көтере алады.