Almaty Aqparat медиахолдингіне қарасты «Вечерний Алматы» газетінің шығармашылық ұжымына Президенттің БАҚ саласындағы Алғысы берілді, – деп хабарлайды aqshamnews.kz тілшісі.
Кәсіби мереке қарсаңында Қазақстан Республикасы Президенті марапаттанғандар қатарында биыл 90 жылдық белеске жеткен қарт басылым «Вечерний Алматы» газеті де бар.
Газет ұжымына "Еліміздің және өңірдің әлеуметтік-экономикалық дамуын кешенді түрде жариялауға қосқан үлесі үшін" жарияланған Алғыс бүгін Ақордада тапсырылды. Басылым қызметіне берілген жоғары баға газет ұжымы кәсібилігінің мойындалуы болды.
Басылым қызметінің жоғары бағалануы – Алматы мен Қазақстанның дамуындағы өзекті мәселелерді ұзақ жылдар бойы объективті әрі жан-жақты жариялап келе жатқан журналистердің, редакторлардың және газеттің барлық қызметкерлерінің кәсіби еңбегіне берілген құрмет. Басылым әлеуметтік бастамаларға, экономикалық реформаларға және халықтың өмір сүру сапасын арттыру мәселелеріне ерекше назар аударып келеді.