Kazakh Tourism «Үздік туристік ауыл – 2025» байқауына қатысуға өтінімдер қабылдау басталғаны туралы мәлімдеді.
Байқауға қатысуға өтінімдер биылғы 30 желтоқсанға дейін қабылданады. Оған облыс әкімдіктері 3 ауылды ұсына алады, деп хабарлайды aqshamnews.kz.
Kazakh Tourism ұлттық компаниясының басшысы Қайрат Сәдуақасовтың айтуынша соңғы жылдары осындай саяхатқа қызығушылық артып келеді.
«Мәдениет пен дәстүрге бай және қолөнерді сақтаған әрі бірегей табиғи ландшафттары бар ауылдық аумақтарды анықтауға және ілгерілетуге ниеттіміз. Олар жаңа бағыттар мен аутентикалық туризмді таңдаған туристер үшін тартымды болуы мүмкін», деді ол.
Байқауға қатысушыларды туризм және оған сабақтас салалардағы сарапшылардан тұратын тәуелсіз кеңес бағалайды. Ұлттық кезеңнің жеңімпаздары БҰҰ Дүниежүзілік Туристік Ұйымы (UN Tourism) өткізетін UN Tourism Best Tourism Village халықаралық байқауында Қазақстанды таныстырады.
Айта кетсек, 2023 жылы Алматы облысының Саты ауылы беделді «BEST Tourism Villages by UNWTO 2023» сыйлығымен марапатталған еді.