Қазақстан Республикасы парламенті Мәжілісінің депутаттары: Сарым Айдос Әміроллаұлы, Сулейменова Жұлдыз Досбергенқызы, Құспан Айгүл Сайфоллақызы, Алматы қаласы мәслихатының депутаты Бөлекбаева Райхан Чантықызы, «Алматы мемлекеттік энергетика және электронды технологиялар колледжінің» директоры, Алматы қаласы қоғамдық кеңесінің мүшесі Тайтулеев Төлеуғали Мұхаметжанұлы және Аманат партиясының Алматы қаласы Әуезов аудандық филиалының төрағасы Ордабаева Найля Алтынбекқызы өткен аптада «Ұстаздар үйіне» келді, деп хабарлайды Almaty-akshamy.kz
«Өрлеу» – Алматы қаласы бойынша Кәсіби даму институтының директоры Садвакасова Раиса Аждарқызы қонақтарды күтіп алып, курс өтіп жатқан аудиторияларды аралатып, мұғалімдермен кездестірді.
Халықтың жағдайын жақсартуды көздейтін Референдум туралы түсіндірме жұмысымен келген Мәжіліс депутаттары қолданыстағы Ата Заңға енгізілетін өзгерістер мен толықтырулар азаматтардың сұранысына негізделіп, жалпы қоғамның мүддесіне бағытталғаны туралы баяндады.
Атап айтсақ, жер және оның қойнауындағы байлықтар мен табиғи ресурстар халыққа тиесілі, Қазақстан Республикасының Президенті өз өкілеттігін жүзеге асыру кезеңінде саяси партияда болмауға тиіс, Қазақстан Республикасы Президентінің жақын туыстарының саяси мемлекеттік қызметшілер лауазымдарын атқаруға құқығы жоқ, Конституциялық сот, тағы да басқа жаңа Қазақстанның келбетін айқындай түсетін өзгерістерге жан-жақты тоқталды.
Президенттің өкілеттігін күшейту емес, ықпалды Парламент құру арқылы қарапайым халыққа есеп беретін Үкімет қалыптастыруды көздейтін бүкілхалықтық референдум ерекшеліктерін тайға таңба басқандай нақтылап түсіндірген лауазымды қонақтар «Ұстаздар үйінің» қызметкерлерімен дөңгелек үстел басында кездесіп, мұндағы түйінді мәселелердің тиімді шешімін қарастыруға уәде берді.
Елін, жерін, тарихын қастерлейтін, қоғамдағы тұрақтылық пен тыныштықты қолдайтын әрбір азамат Жаңа Қазақстанның болашағы үшін 5 маусымда өтетін референдумға қатысып, өз таңдауын жасайды. Бұл – біздің азаматтық борышымыз!