Әзірбайжандық кәсіпкер Ақтауда ұшақ апатынан қаза тапқан қазақстандықтардың отбасыларына пәтер сыйлады, деп хабарлайды aqshamnews.kz
Қазақстан мен Әзірбайжан елшіліктері ұшақ апатынан қаза тапқандарға арнап ас берді. Осы шарада әзірбайжандық кәсіпкер Әмиль Юсифов қаза тапқан қазақстандықтардың отбасыларына Алматы қаласынан екі бөлмелі бес пәтер кілтін тапсырды. Баспана толық жиһаздармен және тұрмыстық техникамен жабдықталған. Сонымен қатар, Қазақстанға үш көлік тапсырды — Маңғыстау облысы Төтенше жағдайлар департаментіне, қалалық ауруханаға және жедел жәрдем станциясына.
Маңғыстау облысының әкімі Нұрдәулет Қилыбай кәсіпкерге алғысын білдіріп, бұл қадам Қазақстан мен Әзірбайжан арасындағы достықтың тағы бір белгісі екенін атап өтті.