Жоба аяқталғаннан кейін әуежай терминалының өткізу қабілеті айтарлықтай артады, деп хабарлайды aqshamnews.kz тілшісі.
Абай облысы әкімінің тапсырмасына сәйкес, Үржар ауылындағы әуежай терминалын қайта жаңғырту жобасы кезең-кезеңімен жүзеге асырылуда. Бұл – өңірдің көлік инфрақұрылымын дамытуға бағытталған маңызды жобалардың бірі.
Жоба аяқталғаннан кейін әуежай терминалының өткізу қабілеті айтарлықтай артады. Қазір әуежай сағатына 30 жолаушыға қызмет көрсетсе, жаңғырту жұмыстарынан кейін бұл көрсеткіш 140 жолаушыға дейін ұлғаяды.
Жаңғыртылған терминал өңірдің көлік-логистикалық әлеуетін нығайтып, Үржар ауданының туристік және инвестициялық тартымдылығын арттыруға, сондай-ақ, әлеуметтік-экономикалық дамуына жаңа серпін бермек.