Алматы қаласындағы №157 жалпы білім беретін мектепте Қазақстан Республикасы Парламенті Сенатының депутаты, танымал журналист Нұртөре Жүсіп Байтілесұлымен әсерлі кездесу ұйымдастырылды. Бұл шараға Наурызбай аудандық білім бөлімінің басшысы Құсайынова Салтанат Амангелдіқызы мен мектеп басшысы Ахметова Света Ағабекқызы да қатысты, деп хабарлайды aqshamnews.kz
Журналистика саласында мол тәжірибесі бар, «Сарыарқа самалы» газетінің агроөнеркәсіп журналисті болып бастап, «Ақ жол Қазақстан», «Жас алаш», «Егемен Қазақстан», «Астана Хабары», «AIQYN» газеттерінің бас редакторы қызметтерін атқарған Нұртөре Жүсіп Байтілесұлының өмір жолы – жас ұрпақ үшін үлкен үлгі. Қазіргі таңда Сенат депутаты болып отырған тұлға өзінің кәсіби тәжірибесімен, туған өлкеге деген сүйіспеншілігімен және ұлт мүддесіне қызмет етудегі ұстанымымен бөлісіп, оқушыларға рухани азық берді.
Кездесу барысында Сенат депутаты туған жері, шығармашылық және еңбек жолы туралы әңгімеледі. Оқушыларға ұлттық құндылықтарды құрметтеудің, адал еңбектің, білімге құштарлықтың маңыздылығын жеткізе отырып, өзінің журналистік және қоғамдық қызметтегі жетістіктерін, тәжірибелерін баяндады. Сондай-ақ, оқушылармен еркін сұхбат құрып, олардың сауалдарына жауап берді. Өзінің ғибратты әңгімесі арқылы оқушыларға өмірлік сабақ бере отырып, рухани күш-қуат, мақсатына жетуге деген талпыныс пен сенімділіктің маңызын ұғындырды.
Бұл кездесу жас буын үшін білім мен тәрбиеге толы рухани сабақ болды. Нұртөре Жүсіптің қажырлы еңбегі, елімізге деген адал қызметі мен жас ұрпаққа үлгі боларлық қасиеттері оқушыларға үлкен тәжірибе жинақтауға және болашаққа сеніммен қарауға жол ашты.
