Үндістанда тарала бастаған қауіпті вирустан көз жұмғандар бар
Дүниежүзілік денсаулық сақтау ұйымының мәліметі бойынша, бұл індетке шалдыққандардың 40-тан 75 пайызына дейін өлім құшу қаупі бар, деп хабарлайды Almaty-akshamy.kz 24.kz-ке сілтеме жасап.
Қазір ең қатерлі аймақ Керала штаты болып тұр. Мұнда 11 науқас анықталған. Бірер күн бұрын ғана аталған аймақта нипахтан 12 жастағы ер бала қайтыс болды. Жаңа індеттің таралуына байланысты бірнеше штатта қауіпсіздік шаралары күшейтілді. Эпидемиологтар ең үлкен қауіп балаларға төнуі мүмкін деп дабыл қағуда.
Керала штатындағы ауруханада ата-аналардың зары мен балалардың жанайқайынан құлақ тұнады. Қатерлі вирус Кожикоде қаласын үрей құшағында ұстап отыр. Дәрігерлердің айтуынша, 11 науқастың халі мүшкіл. Алдында 38 адам оқшауланған еді, бүгін олардың саны 3 есе артты. Балаларын жетектеген жүздеген тұрғын емханалардың табалдырығын тоздырып жүр. 12 жастағы баланың өлімі тұрғындарын үрейін ұшырып отыр.
«Баламның температурасы жоғары болып тұр. Басы да қатты ауырады. Көршім нипахтан көз жұмған әлгі баланың ауруы да осылай басталған деп шошытып қойды», - деді Кожикоде тұрғыны Сандеш Падита.
«Ауруханаға келген барлық адамды тексереміз, анализдерін аламыз. Бұл індетті бірден анықтау қиындау. Нәтижені Нью-Делиге, зерттеу орталықтарына жібереміз. Келгендердің көбі тұмауратып, басынан күн өтіп, басқа ауруға шалдыққандар. 3 ер адамнан коронавирус анықталды. Оларды оқшауладық», - дейді Кожикоде орталық ауруханасының дәрігер-эпидемиологы Лата Хемгала.
Нипах вирусы тамақ арқылы жануардан және адамнан адамға жұғады. Әзірге одан емдейтін ешқандай дәрі жоқ. Бұл індет Керала штатында 2018-2019 жылдары таралып, біраз адам ажал құшқан болатын.
Жергілікті шенеуніктердің айтуына қарағанда, жағдай Үндістан Президентінің тікелей назарында. Үкімет індет таралған қаланы ғана емес, тұтас штатты, сондай-ақ онымен шектес 3 аймақты қатаң бақылауға алған.