Елге кіру үшін ПТР сынақтары қажет емес.
22 қарашадан бастап Үндістан билігі шетелдіктердің кіруіне қойылатын талаптардың басым бөлігін алып тастады, деп хабарлайды Almaty-akshamy.kz inbusiness.kz cілтеме жасап.
Жергілікті БАҚ-тың жазуынша, вакциналау енді халықаралық келушілерге міндеттелмейді.
"COVID-19 траекториясының тұрақты құлдырауы әлемде және Үндістанда COVID-19 вакцинациясын қамтудағы елеулі жетістіктерге байланысты. Денсаулық сақтау және отбасылық әл-ауқат министрлігі Халықаралық келушілерге арналған нұсқаулықтың қайта қаралған нұсқасын шығарды", - делінген хабарламада.
Сонымен қатар шетелдіктерге енді Air Suvidha порталында вакциналау туралы декларацияны толтыру, сондай-ақ елге кіру үшін ПТР сынақтары қажет емес.
Өткен аптада билік Үндістанда ішкі және халықаралық рейстерде маска тағу міндетін алып тастады. Енді саяхатшылар бетперде тақпағаны үшін айыппұл төлемейді.