Қазақстан халқына Жолдауында Мемлекет басшысы Қасым-Жомарт Кемелұлы Тоқаев еліміздің орнықты дамуы үшін қажетті өзгерістерге терең тоқталып, талдап көрсетті. Соның қатарында білім мен ғылымды дамытуға басымдық берудің маңызын атап өтті.
Елдің орнықты дамуы үшін заңға құрмет, адал еңбек пен отаншылдық қоғамның негізгі құндылықтарына айналуы керек. Президент ел болашағы білімді азаматтарға, білікті мамандарға және жаңа технологияларды меңгеруге байланысты дей келе, бұл стратегиялық басымдық екендігін ұдайы дәлелдеп келеді. Зиялы қауым, ғылыми интеллигенция және барша білімгерлер бұл ұстанымды барынша қолдайды және әрқайсысы өз үлесін қосады деп сенемін.
«Жалпы, кез келген реформаны іске асыру үшін заңдарды жетілдіру, саяси институттарды нығайту жеткіліксіз. Ең алдымен, сана жаңғыруға тиіс. Еліміз орнықты дамуы үшін қоғамда жаңа этика орнығуы қажет. «Адал азамат» идеологиясы өміріміздің ажырамас бөлігіне айналуы керек. «Әрекет түбі – берекет» деген халқымыз. Сондықтан мейлінше ширақ болып, отаншыл азамат екенімізді жасампаз істермен көрсету аса маңызды. Ал отаншыл болу – заңды құрметтеу, тәртіпке бағыну, ел игілігі үшін табанды еңбек ету деген сөз», – деп атап өтті Президент.
Сондай-ақ, Президент Қазақстан әрбір азаматтың дамуына жол ашатын, жалпыға бірдей мүмкіндік беретін, бірлігі бекем, әділетті әрі өркениетті мемлекет болуын тілейтінін жеткізді. Осы тұрғыдан мықты ғалымдар, кәсіби инженерлер, ұлағатты ұстаздар мен білікті дәрігерлер әрқашанда керек дегенді баса көрсетті. Жоғары білім саласының қызметкері ретінде Президенттің бастамаларын қолдай отырып, зиялы қауым қоғамдық сананы қалыптастыруда, ұлтты ұйыстыруда алдыңғы шептен көрінеді дегенге сенім білдіремін.
Мемлекет басшысы ішкі, сыртқы саясаттың, экономиканың, қаржы және әлеумет жағдаятына кешенді тоқталды, барлық толғақты мәселе назарында екендігін дәлелдеді. Соның қатарында жаңа Қазақстан азаматтарының белсенділігі артып, санасының жаңғырғанын қалайтыны маған ерекше әсер етті. Бұл ұстаным сөзсіз жемісін береді!
Аязби Ақбергенұлы, Халықаралық ақпараттық технологиялар университетінің профессоры