Испанияның Понтеведре қаласында өтіп жатқан күрес түрлерінен 20 жасқа дейінгілер арасындағы әлем біріншілігінде көк байрағымызды желбіретіп, әнұранымызды әуелеткен «Динамо» спорт қоғамының спортшылары, Ұлтық ұланның мерзімді қызметтегі әскери қызметшілері қатардағы Ислам Евлоев пен Айбек Айтбеков елге оралды, деп хабарлайды aqshamnews.kz.
Балуандарды таңғы сағат 08.20-да Алматы халықаралық әуежайынан «Динамо» спорт қоғамы, Ұлттық ұланның «Оңтүстік» өңірлік қолбасшылығының әскери қызметшілері және спорт сүйер қауыммен бірге жерлестері әскери оркестрмен күтіп алды.
Байрақты бәсекені Қазақстан құрамасы 1 алтын 1 күміс және 3 қола медальмен қорытындылады. Қазақстан командасының құрамында Ұлттық ұланының әскери қызметшілері де өнер көрсетті.
Турнирде 82 келіге дейінгі салмақта сынға түскен ұландық жауынгер Ислам Евлоев жастар арасында әлем чемпионы атанып, боз кілемде қазақ елінің абыройын асқақтатты. Ал Айбек Айтбеков 55 келі салмақта сынға түсіп, үшінші орынды иеленді.
- Үлкен қошеметпен қарсы алып жатқан еліме, «Динамо» спорт қоғамы мен өзім борышымды өтеп жүрген Ұлттық ұлан басшылығына алғыс айтамын! Өте керемет сезімде тұрмын. Сөзбен айтып жеткізу мүмкін емес. Бұл жарысқа жақсы дайындықпен бардым. Маған қолдау білдіріп, жанкүйер болған барша отандастарыма алғысым шексіз, – дейді ұландық чемпион Ислам Евлоев.
Айбек Айтбеков.
Бұл оның әлем чемпионатына екінші рет қатысуы. Алғаш рет 2019 жылы Венгрияның Будапеш қаласында өткен чемпионатқа қатысқан болатын.
Чемпион Қазақстан Республикасының ІІМ мен Ұлттық ұлан Бас қолбасшысына және «Динамо» спорт қоғамының басшылығына өзіне үнемі қолдау көрсетіп, спортпен айналысуға жағдай жасап келе жатқанына алғыс білдірді.
Айта кетейік, Ислам Евлоев әскери борышын Петропавлда, ал Айбек Айтбеков Алматыдағы Бауыржан Момышұлы атындағы 5571 әскери бөлімінде өтеуде.