Сайыстың барлық кезеңі америкалық парламент форматы (AПФ) бойынша өтіп, үздіктер анықталды.
Астанада Қазақстанның әр өңірінен келген 120 пікірсайысшының қатысуымен екі күн бойы турнир өтті, деп хабарлайды Аlmaty-akshamy.kz.
Оқу-ағарту министрлігінің баспасөз қызметінің хабарлауынша, сайыстың барлық кезеңі америкалық парламент форматы (AПФ) бойынша өтіп, үздіктер анықталды.
Қазақ, орыс және ағылшын лигаларында І орынды Батыс Қазақстан, Ақтөбе облыстары мен Астана қаласының командалары жеңіп алды.
«Пікірсайыс – көшбасшы жастарды тәрбиелейтін ең мықты құрал, білімге жетелейтін алтын баспалдақ десек те болады. Сіздер екі күн бойы сынға түсіп қана қоймай, жаңа дос таптыңыздар. Жаңа орта қалыптасып, өз білімдеріңізді таразыладыңыздар. Қатысушылардың барлығын және жеңімпаздарды құттықтаймын. Сіздердің әрқайсыларыңыз – ел тізгінін ұстайтын азаматсыздар!» - деді Оқу-ағарту министрі Ғани Бейсембаев.
ІІ, ІІІ орын жүлдегерлері, «Үздік спикер», «Үздік оратор», «Үздік сарапшы» номинациясының иегерлері мен қатысушыларға Оқу-ағарту министрлігі атынан сыйлықтар табысталды.
Айта кетейік, қазіргі күні республика бойынша 6 726 пікірсайыс клубы жұмыс істейді. Онда 120 мыңнан астам оқушы құқықтық мәдениетті, азаматтық белсенділікті, жауапкершілікті, шығармашылық және сыни ойлауды, командада жұмыс істеуді үйренеді.