2024 жылғы 22 қарашада Жамбыл атындағы Қазақ мемлекеттік филармониясында Құрманғазы атындағы Қазақ ұлттық халық аспаптар оркестрінің 90 жылдық мерейтойы аясында күйші, дирижер, «Қазақстанның еңбек сіңірген қайраткері», Мемлекеттік «Дарын» жастар сыйлығының иегері, Темірбек Жүргенов атындағы Қазақ ұлттық өнер академиясының ректоры Арман Жүдебаевтың шығармашылық кеші өтті, деп хабарлайды aqshamnews.kz
Кештің шымылдығы Мұқан Төлебаевтың «Біржан-Сара» операсынан үзіндімен ашылды. Бұл туындыны Құрманғазы атындағы оркестр мен Бақытжан Байқадамов атындағы Мемлекеттік хор капелласы орындап, көрермендерге керемет әсер сыйлады.
Салтанатты шарада елдің танымал тұлғалары мен өнер жанашырлары қатысып, Арман Жүдебаевтың ұлттық өнерді дамытудағы еңбегін жоғары бағалады. Қазақстан Республикасы Президентінің кеңесшісі Мәлік Отарбаев Арман Жүдебаевқа Мемлекет басшысының Құрмет грамотасын табыстаса, Парламент депутаттары Мәулен Әшімбаев пен Ерлан Қошановтың құттықтау сөздері жеткізілді. Сонымен қатар, Ақтоты Райымқұлова, Ербол Мырзабосынов, Дархан Жазықбаев сынды лауазымды тұлғалар кештің ерекше маңыздылығын атап өтті.
Кеш барысында ұлттық және әлемдік классикалық музыканың үздік туындылары шырқалды. Құрманғазының «Сарыарқа», Нұрғиса Тілендиевтің «Махамбет поэмасы», Михаил Глинканың «Руслан мен Людмила» операсынан Увертюра, Петр Чайковскийдің «Пляска», сондай-ақ Арман Жүдебаевтың авторлық күйі «Жетісу» орындалды.
Арман Жүдебаев дирижер ретінде өз шеберлігін паш етіп, көрермендермен ерекше байланыс орнатты. Оның зал толы көрермендердің шапалақтарын ритмге сәйкестендіруі кешке ерекше серпін берді.
Кештің айрықша ерекшелігі – музыкалық жанрлардың үйлесімділігі мен орындаушылардың кәсіби шеберлігі болды. Концертте Қазақстанның Халық әртісі Рамазан Стамғазиев, Мемлекеттік сыйлық лауреаты Талғат Күзембаев, күйшілер Нұркен Аширов сынды өнерпаздар өнер көрсетті.
Кештің финалында Құрманғазының «Сарыарқа» күйі орындалып, көрермендердің ерекше ықыласына бөленді.
Арман Жүдебаевтың шығармашылық кеші ұлттық музыканың рухын асқақтатқан, өнер сүйер қауымды рухани байытқан айтулы мәдени шараға айналды.