Қазақстанда жалпыұлттық Наурызнама онкүндігі аясында Ұлттық киім күні атап өтіледі. Ұлттық киім – халқымыздың мәдениеті мен тарихының ажырамас бөлігі, қазақ халқының бай дәстүрі мен құндылықтарының жарқын көрінісі. Ел Президенті Қасым-Жомарт Тоқаев Ұлттық құрылтайдың IV отырысында «Ұлттық киім бұл – біздің бірегей ұлттық болмысымыздың маңызды көрінісі», деп ерекше атап өтті.
Мемлекет басшысының бастамасын қолдау мақсатында «AMANAT» партиясының қызметкерлері жыл сайын 18 наурызда ұлттық киім киіп қана қоймай, әр жұма сайын жұмысқа ұлттық киіммен келуді игі дәстүрге айналдырды. Олар туыстарын, көршілерін және достарын осы бастаманы қолдауға шақырып, ұлттық мәдениетті күнделікті өмірде насихаттауға үлес қосуда.
«AMANAT» партиясы ұлттық құндылықтарымызды, дәстүрімізді және тарихымызды жүйелі түрде дәріптеп келеді. Партияның саяси тұғырнамасында жазылғандай, саяси ұйым ұлттық мәдениетті, өнерді және спортты дамытуға жан-жақты атсалысуда. Партияның қолдауымен ұлттық спорт түрлерін және мәдени құндылықтарды насихаттауға бағытталған іс-шаралар өткізіледі.
Мәселен, «AMANAT» партиясының қолдауымен дәстүрлі ат спортының жандануына және кеңінен насихатталуына ықпал ететін «Ұлы дала жорығы» бәйге-марафоны ұйымдастырылды. Сонымен қатар, партияның тікелей қатысуымен жыл сайын ұлттық спорт саласындағы жетістіктерді ынталандыруға бағытталған «Алтын тұғыр» сыйлығы өткізіледі. Халық ауыз әдебиетін сақтау және дамыту мақсатында тұрақты түрде өңірлік және республикалық деңгейде ақындар айтысы ұйымдастырылады.
«Жастар Рухы» жастар қанаты өскелең ұрпақты ұлттық дәстүрімізді сақтау және насихаттау жобаларына белсенді түрде тартып, ұлттық бірегейлікті нығайтуға бағытталған мәдени және спорттық іс-шаралар ұйымдастырады.