Тиісті заң жобасы әзірленіп жатыр.
Ғылым және жоғары білім министрі Саясат Нұрбек жаңа министрліктің негізгі жұмыс бағыттарын атады, деп хабарлайды Almaty-akshamy.kz Egemen.kz сілтеме жасап.
Оның айтуынша, ғылым саласындағы негізгі міндеттерді Мемлекет басшысы Қасым-Жомарт Тоқаев Алматыға сапары кезінде Ұлттық ғылым академиясында айтқан.
«Біріншісі – Ұлттық ғылым академиясының мәртебесін қайтару және нығайту. Бұл жұмыспен белсенді айналысып жатырмыз. Тиісті заң жобасы әзірленіп жатыр. Екінші үлкен бағыт – университет пен ЖОО-дағы ғылым. Қазір өкінішке қарай, университет ғылымы негізгі ғылым бола алмады. Іргелі, қолданбалы ғылымды қоректендіретін алаңға айналмады. Бұл іске де бар күш-жігерімізді саламыз», - деді Саясат Нұрбек Үкімет отырысынан кейін журналистерге берген сұхбатында.
Сонымен бірге, ведомство қызметінің тағы бір маңызды бағыты – ғылыми-зерттеу және тәжірибелік-конструкторлық әзірлемелерді немесе қолданбалы зерттеулерді қолдау және қаржыландыру.
«Бұл жерде біздің министрлік пысықтап жатқан бірнеше жүйелі шаралар бар. Жақын арада осының барлығын ашық талқылаймыз. Біз өзіміздің ғылыми қауымдастығымыздан, негізгі ЖОО-ның профессорлық-оқытушылық құрамынан базалық техникалық тапсырма аламыз», - деді Саясат Нұрбек.