Алматы қаласының қоғамдық тәртібін қадағалап жүрген Қазақстан Республикасы ІІМ Ұлттық ұланы 5571 әскери бөлімінің жауынгерлері қала тұрғынына жоғалған ұялы телефонын тауып, қайтарып берді.
Оқиға 22 қаңтарда сағат 18.40 шамасында Түрксіб ауданында патрульдік-бекеттік қызмет атқару барысында болған. Жауынгерлік қызмет атқарып жүрген әскери жасақ бастығы ефрейтор Мейіржан Әлсейіт пен патрульшілер Темірлан Қанатұлы, Нұрсейіт Нағимов және Данияр Аманбайұлы жол жиегінде жатқан смартфон тауып алған. Бұл туралы әскери жасақ радиобайланыс арқылы патрульдік топ бастығына баяндаған.
– Біз 4-бақылау нүктесінде тұрған болатынбыз. Сол уақытта жол жиегінде қардың астында жарығы жанып жатқан ұялы телефонды көріп қалдық. Бірден патрульдік топ бастығына баяндап, қызметімізді жалғастырдық. Біраз уақыттан кейін ұялы телефон иесі басқа нөмірден қоңырау шалды. Біз оған көз жеткізген соң телефонды заңды иесіне табыстадық, – дейді ефрейтор Мейіржан Әлсейіт.
Қала тұрғыны жоғалған ұялы телефонын өзіне қайтарған құқықтық тәртіп әскерінің сақшыларына қырағы және қызметтерін мұқият атқарғаны үшін алғысын білдірді.