Қазақстан Республикасы Ұлттық академиялық кітапханасының балалар әдебиеті залында «Ұлан» республикалық балалар мен жасөспірімдер газетінің құрылғанына 95 жыл толуына орай көрме ұйымдастырылды, деп хабарлайды aqshamnews.kz.
Көрменің мақсаты – газеттің тарихи мұрасын насихаттау, 95 жылдық жолын көрсетіп, оның қазақ балалар журналистикасындағы рөлін айқындау. Жас оқырманды ақпаратпен таныстыру, газеттің бұрынғы және қазіргі нөмірлерін ұсыну арқылы балалар мен жасөспірімдердің оқуға деген қызығушылығын арттыру.
«Ұлан» газеті 1929 жылы алғаш рет жарық көргеннен бері, өз оқырмандарының сенімді досына айналды.
Газет бір ғасырға жуық уақыт бойы балаларға ақпарат беріп қана қоймай, жас ұрпақты білімге құштар етуге, олардың санасына ұлттық құндылықтарды сіңіруге үлес қосып келеді.