Алғашқы қоңырау мерекесі сынып сағаты ретінде аталып өтті.
Алматы қалалық Қылмыстық атқару жүйесі департаментіне қарасты ЛА-155/6 түзеу колониясында да Білім күні аталып өтті, деп хабарлайды Almaty-akshamy.kz.
Аяғын шалыс басып, жазалы болып, соттлаған балалар тәрбиеленіп жатқан мекемеде жаңа оқу жылының басталуына орай ұйымдастырылған алғашқы қоңырау мерекесі сынып сағаты ретінде аталып өтті.
Мекемедегі сотталғандар арасында әлеуметтік-психологиялық тәрбие жұмысы бөлімінің бастығы, әділет майоры Алма Бәзілбаева ұстаздар мен оқушыларды Білім күнімен құттықтады. Мектеп мұғалімдерінің қажырлы еңбегіне алғыс айта отырып, сәттілік, табыстар тіледі.
Биыл балалар түрмесіндегі білім ошағында 4 сынып жасақталған. 10-11-сыныптарда барлығы 33 оқушы білім алады. Оларға 11 мұғалім сабақ беретін болады. Жастардың қауіпсіздігі үшін ұстаздар түгел дерлік екпе алған.
Бүгінгі айтулы күнде әр сыныптың жетекшілері «Тәуелсіздік жетістіктері» деген тақырыпта сынып сағатын өтті. Қазақстанның 30 жыл ішінде жеткен жетістіктері сараланып, жасөспірімдерге түсіндірілді.