Жазасын өтеушілердің дені 18-35 жас аралығындағы жастар.
Елімізде бас бостандығынан айырылып, түрмеде отырған адамдар да жоғары оқу орындарында білім алуы мүмкін, деп хабарлайды аlmaty-akshamy.kz.
Қазақстанның Адам құқықтары жөніндегі уәкілі Ғылым және жоғары білім министрінен сотталушыларға оқу квотасын бөлуді сұрап отыр.
Артур Ластаевтың мәліметінше, жазасын өтеушілердің дені 18-35 жас аралығындағы жастар. Оған қоса, қамаудағы 28 500 адамның 59 пайызы орта, 24 пайызы арнаулы орта білімді, 6 пайызы мүлдем білім алмаған. Сондықтан оларды дұрыс жолға бейімдеудің бірден бір бағыты - мамандық алуларына мүмкіндік жасау дейді.
Оның айтуынша, бакалавриат бағдарламалары бойынша оқудың орташа құны жылына 1 миллион теңге. Бұл соманы сотталушылар төлей алмайды.
"Жоғары білім алу – сотталғандарға бостандыққа шыққаннан кейін өз мүмкіндіктерін іске асыру тиімділігін арттыруға жол ашатын, сол арқылы қайта қылмыс жасау ықтималдығын азайтып, әлеуметтендіруге арналған бағыттардың бірі. Сонымен қатар мемлекеттің міндеті – сотталғандарды түзеу мекемесінен тыс өмірге дайындау", – деді Адам құқықтары жөніндегі уәкіл Артур Ластаев.