Алматы қаласының Түрксіб ауданындағы №11 өрт сөндіру бөлімінде діни экстремизм мен терроризмнің алдын алуға бағытталған ақпараттық-түсіндіру іс-шарасы ұйымдастырылды.
Жиын Саяхат сауда орталығында өтіп, радиомұнара арқылы көпшілікке таратылды, деп хабарлайды aqshamnews.kz.
Шараның мақсаты – мемлекеттік құрылым қызметкерлерінің діни және құқықтық сауаттылығын арттыру арқылы қоғамдағы тұрақтылықты сақтау. Дәрісті Алматы қаласының ақпараттық-түсіндіру тобының мүшесі, дінтану магистрі Мәдина Серікқызы Әлімғожинова жүргізді.
Маман өз сөзінде ҚР Конституциясы мен дін саласына қатысты заңнама нормаларына тоқталып, діни сенім бостандығы мен діни экстремизмнің айырмашылығын түсіндірді. Ол деструктивті ағымдардың әрекет ету жолдарын нақты мысалдармен көрсетіп, радикалды идеялардың адамдардың құқықтық және рухани әлсіздігін пайдаланатынын атап өтті.
Дәріс барысында қатысушыларға экстремистік ұйымдардың алдау тәсілдері мен олардан сақтану жолдары жайлы бейнематериал көрсетілді. Сонымен қатар, дінтанушы теріс діни мазмұндағы ақпараттарды тек ресми дереккөздерден алуға кеңес беріп, сенімге селкеу түсіретін топтармен байланыс орнатпау керектігін ескертті.
Іс-шара соңында қатысушылар дәрістің өзектілігін атап өтіп, ондағы мәліметтердің кәсіби қызметке де, жеке санаға да оң ықпал ететінін жеткізді. Өрт сөндіру саласында қоғамдық қауіпсіздік пен ішкі тұрақтылықты сақтау басты міндеттердің бірі болып табылады.
Аталған іс-шара – діни экстремизм мен терроризмнің алдын алу бағытында жүргізіліп жатқан жүйелі жұмыстың бір бөлігі. Мемлекеттік қызметкерлердің діни және құқықтық сауаттылығын арттыру – радикалды идеологияларға қарсы тұра алатын қоғамдық иммунитетті қалыптастырудың маңызды қадамы.