Денсаулық сақтау.
Алматы қаласы әкімінің міндетін атқарушы Ерболат Досаев Түрксіб ауданы тұрғындарымен кездесті. Кездесу барысында ауданда бой көтеретін әлеуметтік маңызды нысандар жайлы айтылды, деп хабарлайды Almaty-akshamy.kz.
Денсаулық сақтау инфрақұрылымын дамыту және Түрксіб ауданының көбейіп жатқан тұрғындарын медициналық қызметтермен қамтамасыз ету үшін биыл желтоқсан айында «Нұршашқан» шағынауданында бір ауысымда 100 адамды қабылдайтын дәрігерлік амбулаторияның құрылысы басталады.
Сондай-ақ 2023 жылдың I тоқсанында Айбасов көшесінде бір ауысымда 200 адамды қабылдайтын дәрігерлік амбулатория салу жоспарланған.
«Қайрат шағынауданында 340 келушіге арналған емхана құрылысының жобалау-сметалық құжаттамасы 2023 жылдың II тоқсанында мемлекеттік сараптамадан өтеді. Жалпы, жоғарыда аталған шаралар күніне келетін пациенттердің санын 800 адамға дейін арттыруға мүмкіндік береді», - деді Е.Досаев.
Әлеуметтік және спорттық нысандар
Қазіргі уақытта ескі ғимаратты (Р.Зорге көшесі, 2А) күрделі жөндеу үшін жобалау-сметалық құжаттама әзірленуде, онда 2023 жылы әлеуметтік нысандар орталығын ашып, «Бақытты отбасы» әлеуметтік орталығын, «Шыңға өрлеу» әлеуметтік клубын, ардагерлер кеңесін және мүгедектер қоғамын орналастыру жоспарланған.
Сондай-ақ 2023 жылдың I тоқсанында «Жас Қанат» шағынауданында бассейні бар екінші дене шынықтыру-сауықтыру кешені ашылады.
2023 жылдың II тоқсанында «Авиатор» стадионының аумағында (Майлин көшесі бойында) дене шынықтыру-сауықтыру орталығының жобалау-сметалық құжаттамасын әзірлеуді аяқтау жоспарланған.