Олар осы уақытқа дейін 7 тірі адамды тапты.
Президент Қасым-Жомарт Тоқаев Түркияға барған құтқарушылардың мемлекеттік наградаға ұсынылатынын мәлімдеді, деп хабарлайды Almaty-akshamy.kz Ақордаға сілтеме жасап.
Бүгін Мемлекет басшысы құтқарушыларды дайындайтын Мәлік Ғабдуллин атындағы Азаматтық қорғау академиясына барды. Курсанттардың алдында сөз сөйлеген Тоқаев Түркиядағы зілзаладан кейін құтқару шараларына қатысып жатқан қазақстандық мамандардың мемлекеттік наградаға ұсынылатынын айтты.
"Жақында Түркияда жойқын жер сілкінісі болғанын білесіздер. Менің тапсырмаммен бауырлас Түркия еліне құтқарушылар және дәрігерлер жіберілді. Олардың арасында Ақмола облысының мамандары да бар, яғни 18 адам. Біздің құтқарушылар бірнеше адамды аман алып шықты. Түркияда күндіз-түні жұмыс істеп жатқан азаматтарымызға алғыс айтамын! Түркиядан аман-есен оралған соң оларды міндетті түрде марапаттаймыз", - деді Тоқаев.
Айта кетері, Түркияға алдымен бірінші эшелонмен 41 қазақстандық құтқарушы барды. Одан кейін тағы 60 маман зілзаладан кейінгі құтқару шараларына аттанды. Осы уақытқа дейін олар 7 тірі адамды тапты. Бұдан бөлек, қайтыс болған 80 адамның денесін алып шықты.