18-19 қарашада Алматыда Түркітілдес журналистер қорының ұйымдастыруымен "Түркі әлемінің медиа кеңістігі: жаңа дәуірдегі міндеттер мен мүмкіндіктер" тақырыбына VI Халықаралық түркітілдес журналистер медиа форумы өтеді.
Іс-шараға Қазақстан, Орталық Азия, Түркия, Еуропа елдерінен БАҚ басшылары, журналистер, депутаттар, медиа саласындағы ҮЕҰ басшылары, Қоғам қайраткерлері, PR менеджерлер, баспасөз хатшылары, журналистика факультетінің мұғалімдері мен студенттері т.б. қатысады.
"Медиа және мәдени бірегейлік: БАҚ арқылы түркі әлемінің байланысын нығайту", "Түркі елдері арасындағы цифрлық көпір: PR-дағы жаңа технологиялар, платформалар және құралдар", "Медиабизнестегі тұрақтылық пен инновациялар: болашақтың моделі", "Жаңа дәуір шындығы: БАҚ-тағы жасанды интеллект" тақырыптарындағы отырыстарда түркі әлемі медиасында ортақ ақпараттық алаң қалыптастыру жолдары, мәдени мұралар арқылы түркінің ұлттық құндылықтарын насихаттау, түркі мемлекеттерінің әлемдік аренадағы имиджін нығайту үшін PR стратегиясын үйлестіру, БАҚ-тағы кіріс көзін диверсификациялау, ақпаратты табыс көзіне айналдырудың жолдары, контент дайындау және өңдеу процестерінде жасанды интеллектті пайдалану, т.б. мәселелер талқыға салынады.
Медиа форум шеңберінде ұйымдастырылатын "Әлеуметтік журналистика: БАҚ-тағы әлеуметтік мәселелер" тақырыбындағы семинар-тренингте Германиядағы "Неміс толқыны" телеарнасы Түрік редакциясының директоры Эркан Арыкан "Deutsche Welle": жасанды интеллект көмегімен жасалған жалған видеоларды анықтау" тақырыбына шеберлік сабағын өтеді.
Сондай-ақ, "Түркітілдес журналистер қоры" ҚҚ "Шеврон" компаниясы серіктестігінде ұйымдастырған "Әлеумет – қоғам айнасы"-2025 байқауы мен "Halyk Bank" АҚ серіктестігінде ұйымдастырған "Еркін сөз"-2025 байқауының жеңімпаздарын марапаттау салтанаты өтеді.