Анкарада Түркі мәдениеті халықаралық ұйымында (ТҮРКСОЙ) түркі халықтарының рухани-мәдени мұрасындағы ана бейнесіне арналған «Түркі әлемінің аналары: дәстүр және қазіргі заман» атты халықаралық дөңгелек үстел мен «Түркі әлемінің аналары» атты халықаралық көрме өтті.
Шараның мақсаты – түркі өркениетіне тән ана болмысын, мейірім мен даналықты, рухани қайсарлықты және ұрпақ сабақтастығын дәріптеу. Іс-шара халықаралық «Түркі әлемінің аналары» көрмесі аясында ұйымдастырылып, аналар тұлғасы арқылы түркі халықтарының ортақ мәдени кодын таныстыруға бағытталды.
Дөңгелек үстел барысында түркі халықтарындағы анаға құрмет көрсету дәстүрінің тарихи-мәдени негіздері, әйелдің қоғамдағы және отбасындағы орны, ұлттық құндылықтарды сақтау тәжірибесі жан-жақты талқыланды. Қатысушылар гуманитарлық, мәдени және білім беру салаларында ортақ жобалар әзірлеуге ниет білдірді.
Жиынға Қазақстан, Түркия, Түрікменстан елдерінен мемлекеттік, ғылыми және қоғамдық ұйымдардың өкілдері қатысты. Атап айтқанда: Іс-шараға Түркия Республикасының Отбасы және әлеуметтік қызметтер вице-министрі Леман Йенигүн, ТҮРКСОЙ Бас хатшысы Сұлтан Раев, Қазақстанның ТҮРКСОЙ-дағы өкілі Нышангүл Қаратаева, Түрікменстанның ТҮРКСОЙ-дағы өкілі Лачин Овазгельдиева, Түркия Республикасының Әділет және даму партиясының Түркі мемлекеттерімен байланыстар жөніндегі төраға орынбасары доктор Решиде Юксель, Қазақстан халқы Ассамблеясы Республикалық Аналар кеңесінің төрағасы, Қазақстан Республикасы Президенті жанындағы Әйелдер істері және отбасылық саясат жөніндегі ұлттық комиссияның мүшесі Назипа Шанаи, ҚР Ұлттық музейі директорының ғылыми жұмыс жөніндегі орынбасары Ақмарал Ибраева, ЮНЕСКО қамқорлығындағы «Мәдениеттерді жақындастыру орталығы» музейі директорының орынбасары Салтанат Әшімова, «Мәдениеттердің өзара әрекеттесу орталығы» қоғамдық бірлестігінің директоры Үмітхан Мұналбаева, « TURKTAV» қорының атқарушы директоры Әсел Лахаева, сондай-ақ түркі әлемінің әйел көшбасшылары қатысты.
Шарада құттықтау сөздер мен тақырыптық баяндамалар ұсынылып, түркі халықтары арасындағы рухани ынтымақтастықты арттыру бағытындағы пікірталастар өтті. Көрме аясында түркі мәдениетіндегі Ана бейнесі мен рухани сабақтастықты бейнелейтін жәдігерлер көпшілік назарына ұсынылды.
ТҮРКСОЙ Бас хатшысы Сұлтан Раев түркі әйелдерінің рухани көшбасшылық рөліне жоғары баға беріп, мәдениетаралық диалогты дамытуға үлес қосқан бірқатар қатысушыларды Алғыс хаттармен марапаттады.
Леман Йенигүн Түркі әлемінің мәдениетінде ана тек отбасының ғана емес, бүкіл ұлттың өзегі ретінде қабылданатынын, Орхон жазбаларынан бастап Қорқыт ата кітабында ана бейнесі даналықтың, төзімнің, мейірімділік пен ерліктің символы ретінде ғасырлар бойы ортақ жадымызда сақталып келетінін айта келе, Түркияның әйелдер мен отбасына қатысты әлеуметтік саясаттағы тәжірибесімен бөлісуге дайын екенін, ортақ мәселелерді түркі елдері бірлесе шешуі қажет екенін атап өтті.
Қазақстан халқы Ассамблеясы Республикалық Аналар кеңесінің төрағасы Назипа Шанаи ТҮРКСОЙ шаңырағының астында аналарға арналған халықаралық қоғамдық ұйым құру туралы бастама көтеріп, оның рухани мұраны сақтау мен гуманитарлық ынтымақтастықты кеңейту ісіндегі маңыздылығын атап өтті. Қолдау тапқан жағдайда бұл құрылым «Түркі әлемінің аналары» атты халықаралық қоғамдық ұйым ретінде жұмыс істей алатынын жеткізді.
Жиында Қазақстан Президенті Қасым-Жомарт Тоқаевтың Түркі мемлекеттері ұйымының мерейтойлық саммитіндегі сөзі еске алынып, елдің салт-дәстүр, реформалар, білім, ғылым, сенім, инвестиция және медиация бағыттарындағы бастамалар талқыланды. Түркия Президенті Режеп Тайып Ердоғанның 2025 жылды Отбасы жылы деп жариялауы және «Түркі әлемінің келешегі – 2040» құжатының қабылдануы ана мен отбасы құндылықтарын нығайту жолындағы ортақ стратегиялық ұстанымдарды айқындайтыны атап өтілді.
Лачин Овазгельдиева Түрікменстандағы отбасы және ана саясаты бойынша мемлекеттік қолдау шараларын таныстырды.
ЮНЕСКО қолдауындағы орталық өкілі Салтанат Әшімова ақын, мемлекет және қоғам қайраткері Олжас Сүлейменовтің ТҮРКСОЙ-ға жолдаған алғыс хатын оқып, мұндай шаралардың Түркі әлемінің өзара жақындасуына зор үлес қосатынын жеткізді.
Түркия Республикасының Әділет және даму партиясының Түркі мемлекеттерімен байланыстар жөніндегі төраға орынбасары доктор Решиде Юксель Томирис, Домалақ ана, Айғаным ханым, Мәншүк пен Әлия сынды қазақтың ұлы аналарын, сондай-ақ Анадолының Нене Хатун, Фатма Сехер Эрден және Халиме Чавуш сынды тарихи тұлғаларын атап өтіп, олардың ерлігі мен рухани қуаты түркі әйелдерінің ортақ бейнесін қалыптастыратынын айтты.
«Түркі әлемінің аналары: дәстүр және қазіргі заман» атты дөңгелек үстел түркі халықтары арасындағы мәдени диалогты тереңдетіп, рухани сабақтастықты аналардың бейнесі арқылы дәріптеудің маңызды алаңына айналды. Шара барысында аналар кеңестерінің қоғамдық әлеуеті, гуманитарлық бастамаларды қолдаудың маңызы және отбасы құндылықтарын сақтау мәселелері ерекше атап өтілді.
Жиын соңында Түркі әлемінің әйелдер Одағын құру туралы бастамалық идеялар да ортаға салынды.