АҚШ президенті Дональд Трамп Ақ үйдегі сопақ кеңседе елдің әр өңірінен келген пасторлар мен діни көшбасшыларды қабылдап, олармен бірге дұға жасады, деп хабарлайды Aqshamnews.kz тілшісі.
Ақ үйде өткен кездесуде АҚШ-тың түрлі штаттарынан келген пасторлар мен діни жетекшілер жиналып, президент Дональд Трамп үшін және елдің болашағы үшін дұға етті. Кездесу Сопақ кабинет (овальды кабинет) ішінде өткен.
Желіде тараған видеода Трамп жұмыс үстелінде отырған сәтте пасторлар оның айналасына жиналып, кейбірі қолдарын иығына қойып дұға оқығаны көрінеді. Дұға кезінде президентке даналық, күш-қуат және қорғау тілеген. Сондай-ақ АҚШ әскері мен елге қызмет етіп жүрген азаматтарға да амандық сұралған.
Ақ үйдің байланыс жөніндегі кеңесшісі Марго Мартин бұл сәттің видеосын әлеуметтік желіде жариялаған. Кадрларда діни жетекшілер президенттің елді басқаруда дұрыс шешім қабылдауына Құдайдан көмек сұрап, АҚШ-тың «Құдайдың қорғауындағы біртұтас мемлекет» болып қала беруін тілейді.
БАҚ мәліметінше, Трамптың діни қауым өкілдерімен мұндай кездесулері бұрын да бірнеше рет ұйымдастырылған. Бұл оның діни ұйымдармен байланысын сақтауға бағытталған бастамаларының бірі ретінде қарастырылады.
Сарапшылардың айтуынша, АҚШ саясатында дін тақырыбы маңызды рөл атқарады және президенттердің діни көшбасшылармен кездесуі елдегі сенім бостандығы мен қоғамдық қолдауды нығайтуға бағытталады.